ХьхьичIунсса паччахIлугърал ва жяматийсса ишккакку, дурккучу ЦIаххаев Зулпукьар Закарияевич увну вай гьантрай 110 шин там хъанай дур.

А. Аьбдуллаева
Зулпукьар Закарияевич Дагъусттан хьхьичIунмай шавриву хъунмасса захIматрал бутIа бивхьуминнавасса цар. ПаччахIлугъралгу, Дагъус­ттаннал жяматралгу мунал захIматран лавайсса кьимат бивщуссар.
Зулпукьар лайкь хьуну ивкIссар личIи-личIисса ПаччахIлугърал наградарттан. Миннувух дур медаллу «За доблестный труд» ва «За оборону Кавказа», ДАССР-нул ва СССР-нул Верховный Советрал ХIурматрал Грамотартту.
Мунал цIа дуллуну дур МахIачкъалаллал №15-мур школалун. ЧIярусса шиннардий Зулпукьар Закарияевич ялапар хъанай ивкIсса Оскардул цIанийсса кIичIираву, №41 къатрал лажин чулийсса чIирай дацIан дурну дур ванал сурат­ращалсса аьпалул ула.
ЛичIи-личIисса жаваблув­сса къуллугъирттай зий, ванал чIярусса мюнпатсса, агьалинан къулайшинна дусса давуртту дурну дур.
Цала буттал шяраву Аьхъарав Зулпукьар Закарияевич ивкIун ур цалчинсса учитель ва директор. Мукуна ва ивкIун ур ххюра шяраваллил аьмсса Советрал председательгу. Му къуллугърай унува ва Гъумучиял школалул директоршивугу дуллай ивкIун ур.
Зулпукьардул сипталий бувну бивкIун бур Аьхъарату Гъумукунсса 8 километралул манзилданийсса 4 метралул уттасса машиналул ххуллу. Укунсса ххуллу щала Гъази-Гъумучиял округрай цалчин бувну бивкIун бур.
Махъ, ЦIуссалакрал район сакин хъанахъисса чIумалгу, Зулпукьардул цимилагу чIа­лачIи бувну бур цала агьалинай дакI цIуцIаву. Шиккува кIицI бан, Зулпукьардул къуртал бувну бур Н.К. Крупскаял цIа­нийсса Педагогикалул академия. Москавлив зузисса шиннардий цувагу хьунаавкьуну ивкIун ур Н. Крупскаящал.
ДАССР-нул Наркомпросрай, яла КПСС-рал областной Комитетрай зузисса чIумал ванал хъунмасса захIматгу бивхьуну, хIарачатгу бувну бур районнай ва шагьрурдай школарду тIитIин, мукунма дяъви хьуннинссагу, хьуну махъссагу шиннардий кказит-журналлу итабакьлан. Зулпукьар Закарияевич зий ивкIун ур Даградиокомитетрайгу, председательнал хъиривчуну ва лакку мазрайсса передачарттал хъунама редакторну.
Ми шиннардийгу ванал ккаккан бувну бур цалва каялувчинал ва сакиншинначинал гьунар. Зулпукьар ур хьхьичIва-хьхьичIсса Дагъусттаннал журналистуравасса ца.
Ва ивкIун ур жагьи-жугьулт­рал хъинсса насихIатчигу. ХIасил, 70 шинал лажиндарай личIи-личIисса жаваблувсса къуллугъирттай зий ивкIун ур Зулпукьар Закарияевич.
Ххуйну хьунссия, ванал 110 шин хъанахъаврицIун дархIуну, миллатрал язисса арс Зулпукьар Закарияевич дакIнийн утлати­сса давуртту дарча. Мукунсса бусравсса инсантал дакIнийн бичлай, минная буслай, ми эбратну ккаккан буллайри жува ялун нанисса ник тарбия дуллан аьркинсса. Мукунни жулва оьрчIру мяърипат, яхI-къирият дуну, буттал буттахъая нанисса аьдатру дуручлай тарбия бан хьунтIисса.