Махъппурттуву ххуйшиврул ва исвагьишиврул сфералуву зузисса, Аьрасатнал шоу-бизнесраву машгьурсса хьхьичIунсса стилистурал, балайчитурал ва киноактертурал ца яла ччя-ччяни тикрал байми махъру бусса бур «Ухссавнил Ккавкказуллал душру яла ккаккан авурми душру бур», тIими махъру. Мунил тасттикьшиннаран кIицI лагавияв ларгмур шинал Австриянаву хьусса «Мисс Австрия» ххуйшиврул конкурсраву ххув хьусса жулва лакку душгу. 

Ххуйшиврул, караматшиврул ва интнил лишанну хьусса мартрал 8-нний кIицI лагайсса Хъаннил байрандалул хьунийн, Дагъусттаннал паччахIлугърал университетрал актовый залданувугу хьунни «Краса ДГУ» тIисса ва вузраву дуклакисса душварал дянивсса конкурс.

Залму АьбдурахIманова
Инсан щяикIан кIану бакъасса актовый залдануву щябивкIун бия университетрал факультетирттал студентътал, преподавательтал ва конкурсрал гьурттучитуран кьимат бищунсса жюри. Жюрилувух бия МахIачкъала шагьрулул администрациялул, ДГУ-рал ва конкурс сакин дан кумаг бувсса «Краса Востока» ххуйшиврул салондалул вакилтал.
«Краса ДГУ» конкурсрал сакиншинначишиву дурну дур ДР-лул Жагьилтурал политикалул комитетрал ва университетрал каялувшиннарал.
ДГУ-рал тарбиялулмур даву дачин дурсса Мадина МахIаммадовал, залданувусса циняв душру-хъами ялун нанисса байрандалущал барчагу буллай, кIицI лавгунни укунсса журалул давурттив жулва жагьи-жугьултрал дянив дуллан аьркиншиву, ми къааьркинсса, чурххан заралсса личIи-личIисса иширттахун къабагьаншиврул ва умуд бивхьунни университетрал чIирттал дяниву укунсса батIавуртту ччя-ччяни дуллантIишиврийн.
«ДакIний битира жулва университетраву дуклай бушиву яла язими, гьунар буми, итххявхми студентътал. Зуру жулла республикалул хIакьинусса ва гьунттийсса кьини. Зуру жул пахру», — увкунни ванил залданувуцири студентътурахь.
Жюрилул хьхьичI къабигьасса масъала бия факультетирттал дяниву язи бувгьусса аьнтIикIартту хьусса душваврал дянива язи бугьан яла гьунар бусса, яла ябацIансса, яла исвагьисса душ.
Конкурсраву гьуртту­сса душвавран «Самопрезентация», «Мой стиль», «Я студентка ДГУ», «Завяжите мне галстук» ва «Дефеле в вечерних платьях» тIисса конкурсрал бутIравух гьуртту хьун багьлай бия.
Цалчинмур бутIуву гьарца душнил бувсуна циятува, цилва хияллая ва дунияллухсса цилла бургаврия. Хъиривмур бутIуву жюрилул ва тамашачитурал хьхьичIун душру бувккуна миллатирттал яннардаву. Душру сахIналийн бувккун, жюрилул хьхьичI бавцIукун, конкурс дачин дурсса душнил ихтияр дуллуна жюрилул вакилтурахьхьун гьурттучитура­хьхьун кIи-кIива суал булун. Гьарзат ххуйя, амма, Да­гъусттаннай хIукуматрал цими театр буссар, тIисса суалданун цуппа-ца душнил тIайласса жаваб къадуллуна. Ттунма къулай бивзсса ци бия учирча, ттун дакIний ливчIунни, щил дурурххур зун ми зуйра лархсса миллатирттал янна, тIисса суалданун жаваб дуллусса юридический факультетрай дуклакисса душнил, цил гьухъа 135 шинал хьхьичI бурувхху­сса, ниттил ниттил ниттил гьухъари, тIисса жаваб.
Ахирданийгу, душварал бувсунни цаятува, университетравусса цалва оьрмулия, дустурая, дуккаврия ва гихунмайсса цалва хияллая.
Ххуйшиврул конкурс лайкьну дурхIусса душваврава яла исвагьимур, яла гьунар бумур аьнтIикIа язи бугьан хъунмасса захIмат хьунни жюрилунгу.
Жюрилул хIасиллайн бувну, конкурсрал номинациярттаву ххув хьунни «Мисс совершенство»- Шакият МахIаммадова, юридический факультетрал студентка, «Мисс грация» ва «Мисс элегантность»- Аьйша Темирханова, социальный факультетрал студентка, «Мисс интеллект» -Зарина Качакаева, кьатIаллил мазурдил факультетрал студентка, «Мисса шарм»- Марианна Сулаева, филологиялул факультетрал студентка, «Мисс артистизм» Марианна МутIалибова, юридический факультетрал студентка.
«Вице-мисс краса ДГУ» цIанин лайкь хьунни Марианна МутIалибова ва «Краса ДГУ-2013» тIисса цIанин ва авурсса тажран лайкь хьунни Марианна Сулаева.
Ахирданий хьхьи­чIунсса кIанттурдан лайкь хьусса душваврал цIардугу бувсун, миннан дипломру ва бахшишру пишкаш дурну махъ, университетрал студентътурал хIадур дур­сса концертрал программа ккаккан дурунни.