Февральданул 12-нний ДР-лул Президентнал кIанайма Рамазан 
АьбдуллатIипов хьунаавкьунни республикалул исполнительный властьрал ва законну дуккан дай властьрал каялувчитуращал.
Хьунабакьаврий гьуртту хьунни ДР-лул Халкьуннал Мажлисрал Председатель Хизри Шихсаидов, ДР-лул ХIукуматрал Председатель Мухтар Мажидов, ДР-лул Президентнал ва ХIукуматрал Администрациялул Каялувчи Шагьаьппас Шагьов, ДР-лул Президентнал управлениярттал хъуними, ХIукуматрал члентал ва цаймигу.
Хьунабакьаврий республикалул бакIчинал официальну ккаккан бунни Дагъусттаннал исполнительный властьрал органнал цIуну бивтсса каялувчитал, мукунма бувсунни цIулаган бувсса структурардал щаллу буллан аьркинсса масъаларттая.
ЦIуну сакин дурсса ХIукуматрал хIакъираву ихтилат бунни республикалул премьер-министр Мухтар Мажидовлул. Ганал мукъурттийн бувну, ДР-лул Президентнал тапшур бувмур ганал биттур бувну бур. Къулбасру дурну дур цIуну къуллугъирттай битаврил хIакъиравусса ДР-лул Президентнал циняв ХIукмурдай. ХIукуматрал Председательнаяр ххишала цинявппагу ДР-лул ХIукуматрал члентал бур 24. Миннавату ца ур ДР-лул ХIукуматрал Председательнал 1-ма хъиривчу, 5 хъиривчу, 18 министр. Сакин бувну бур 8 комитет. ЦIана сакин бувну бур 3 министерство: ДР-лул Транспортрал министерство, ДР-лул ДахIаврил ва телекоммуникациярттал министерство, ДР-лул Машлул ва кьатIаллил экономикарттащалсса дахIавурттал министерство. Дахханашивуртту дурну дур 5 министерствалий: ДР-лул Дуккаврил ва элмулул министерствалий, ДР-лул Хъуслил министерствалий, ДР-лул Миллатирттал иширттал министерствалий, ДР-лул Информациялул политикалул ва массовый коммуникациярттал министерствалий, ДР-лул Промышленностьрал энергетикалул ва связьрал министерствалий.
ХIукуматраву 64 процентрайнусса дахханашиву хьуну дур. Иширайну ДР-лул ХIукуматрал Председательнал хъиривчутал цIусса инсанталли. 12 министргу цIусса инсанталли.
Дагъусттаннал Президентнал кIанайманал бувсунни цIуну бивтсса ХIукуматрал Председательнал хъиривчутурал щаллу буллантIисса масъаларттаятугу. Анатолий Карибов зунтIиссар гуманитар масъаларттаха: дуккаву, просвещение, элму, физкультура, спорт, жагьилтурал политика, печать ва цаймигу.
ФСБ-лул генерал Рамазан Жяъпаров ихтиярду дуруччай органнащал хIала-гьурттуну зунтIиссар. Гужирдал структурардал кураторшиву цалла ДР-лул Президентнал кIанайманал дуллантIиссар. Рамазан Жяъпаровлул мукунна щаллу дуллантIиссар граждан обществалул институтирттащалсса хIала-гьурттушиврул давуртту, яни правалул просвещение, миллатирттал политика, диннал арарду ва цаймигу.
Александр Ермошкин – ХIукуматрал Председательнал хъиривчу ва мунищала архIал АьФ-лул ПрезидентначIасса ДР-лул муданасса вакилнал аьркинссар Вакилханалул даву щалла цIусса тагьарданийн дуцин. Вакилхана властьрал федерал органнащал хIала-гьурттуну зузаврил гужсса информациялул центрну. Га хьун аьркинссар Аьрасатнал регионнай республикалул циняв вакилтурал координаторну.
Юсуп МахIаммадов хьхьичIва Лакрал райондалул бакIчину ия. Га ХIукуматрал Председательнал хъиривчуну итаву районнал ва шагьрурдал каялувчитурайнсса сигналли. Агарда зу лажин кIялану ва мюнпатну зурча, зугу битантIиссару укунсса къуллугъирттай.
Къуллугъчитал баххана буллантIиссар, муданма цава-ца къуллугърай къабивтун.
Абусупиян Хархаров зунтIиссар инвестициярдал проектирдаха, щаллу дуллантIиссар кIанттул цилакаялувшиврул органнащалсса хIала-гьурттушиву, транспортрал ва ххуллурдал хозяйствардаха.
Насруттин Насруттиновлул дачин дантIиссар промышленностьрал политика, финансирттал рынокру, яхьунсса къатрал щаллу баврил ва энергетикалул масъалартту. Яла ДР-лул Президентнал кIанайманал гьартану бувсунни цIуну бивтсса министртурая, комитетирттал каялувчитурая ва цаймигу ведомстварттал бакIчитурая, миннал щаллу буллан аьркинсса масъаларттая.
Хьунабакьаврий ихтилат бунни ДР-лул Халкьуннал Мажлисрал Председатель Хизри Шихсаидовлулгу.
