Вай гьантрай Гъумук райондалул школарттал дуклаки оьрчIал дянив хьунни лакрал шаэртурал назмурду дакIних дуккаврил конкурс. Му хIадур бувну бия Райондалул кIулшиву дулаврил управлениялул.

Зулайхат Тахакьаева
Конкурс райондалий хьу­ссар лув-ялув шамилчин, КIулшиву дулаврил управлениялул ла­кку мазрал дарсру дишаврил методист Камилат Буттаевал жаваблувшиннарайну. Респуб­ликалул конкурсрай кIилва цалчинмур кIану бувгьуссар Ккурккуллал школалул дуклаки душ Мажидова ПатIиматлул.
Конкурсрай гьуртту хьунни 10-11-ми классирттаву дуклакисса 9 душ. Цаннияр цаннил пасихIну ккалай бия душру лакку мазралгу, буттал улклулгу буруккинттарайсса лакрал шаэртурал, хIакьинусса кьинигу агьамсса, язи-язими шеърирду.
Шикку кIицI бан ччива, хIакьину лакку мазгу, лакрал магьирлугъгу яданшиврул, ла­кку мазрал  учительтурал  биялсса захIмат бихьлахьишиву. ОьрчIаву лакку мазрахсса гъира хъун бан, гьамин, ва журалул конкурсирдал кабакьу буллалишиврия бия Ккурккуллал школалул директор Даниял Магьдиевлул, Хъурхърал школалул лакку мазрал учительница Маликат Оьмаровал, КIундиннал школалул лакку мазрал учитель Надиршагь ХуцIаевлул ихтилатру.
Конкурсрал жюрилуву бия КIулшиву дулаврил управлениялул методистътал ва оьрчIру конкурсрай гьуртту къахъана­хъими школарттал лакку мазрал учительтал.
Цалчинмур кIану бувгьунни Гъумучиял  лицейрал дуклаки душ ХIасанова Зулайхатлул (учитель  Аьвдулмажид Исмяилов). КIилчинмур кIану —  Ккурккуллал школалул дуклаки душ Мажидова ПатIиматлул (учитель Даниял Магьдиев): шамилчинмур кIану — Гъумучиял школалул дуклаки душ Сулайманова Зайнаблул (учитель ПатIимат Аьлиева) ва Кьубиял школалул дуклаки душ ХIусайнова Жанет (учитель Сапият Кьасумова).
ХьхьичIунсса кIантту бувгьуминнан райондалул КIулшиву дулаврил управлениялул каялувчи Явсупи ХIамзаевлул буллуна дипломру ва бахшишру. Цалчинмур кIану бувгьусса ХIасанова Зулайхат гьуртту хьунтIиссар республикалулмур конкурсрайгу. ЧIа учинну ванин тIайлабацIу.