Недавно в Махачкале в Малом зале Русского театра прошло торжественное вручение премии «Консолидация – Созидание – Толерантность» имени известного журналиста покойного Гаджимурада Камалова.
МахIачкъалалив журналистътуран дуллай бия чил каних ивкIусса машгьурсса журналист ХIажимурад Камаловлул цIанийсса «Консолидация – Созидание – Толерантность» цIанилусса премия.
Залданувун бухханхьхьичI, театрданул фойерал чIирттайн лархъун дия ХIажимурад Камаловлул суратру, хасъсса чичрурду.
«Консолидация – Созидание – Толерантность» премия Дагъусттанная чичлачисса Аьрасатнал журналистътуран ва изданиярттан дуллай бия ХIажимурад Камаловлул цIанийсса фондрал вакилтал.
Ва кьинилийнсса хIадуршинна дуллай сентябрь зуруя шинмайва байбивхьуну бур тIайлашиврул ва тархъаншиврул лишанну хьусса, цIанихсса журналист, аьпа биву, ХIажимурад Камаловлул цIанийсса ва фонд, ва му премия вания тиннай гьарца шинах дуллан тIий бур язими журналистътуран.
Ва батIавривух гьуртту хьун республикалийн бувкIун бия Аьрасатнал Журналистътурал союзрал секретарь Павел Гутионтов, машгьурсса журналист, «Кавказская политика» интернет-ресурсрал вакил Максим Шевченко, «Кавказский узел» ИА-лул хъунама редактор Григорий Шведов, Аьрасатнал цаймигу изданиярттал журналистътал. БатIаву дачин дурну ия Максим Шевченко.
[pullquote]
Ларгсса нюжмардий, январь зурул 25-нний МахIачкъалалив Оьруснал театрданул ЧIивимур залдануву дия щала ххари дакъасса батIаву. Ва кьини журналистътуран дуллай бия чил каних ивкIусса машгьурсса журналист ХIажимурад Камаловлул цIанийсса «Консолидация – Созидание – Толерантность» цIанилусса премия.
[/pullquote]
ДакIнийн бутан, цIанихсса журналист, «Свобода слова» ООО-рал учредитель, «Черновик» кказитрал ва «Чистое сердце» ихIсаниятрал фондрал гьанурду бивзма ХIажимурад Камалов кIул акъассаннал бивтун увтссар 2011-ку шинал декабрь зуруй. Му ивкIума уттигу лявкъуну акъар. Вай махъсса шиннардий Дагъусттаннай ивкIуну ур 16 журналист, аьмну Аьрасатнаву тIурча – 340 инсан.
Цинявппагу бивзун бавцIуну, ца минутIрайсса пахъ багьунни, аьпалул хьуминнал хIурматран.
Павел Гутионтовлул цалва ихтилатраву чIурчIав дунни ХIажимурад Камалов хъанахъишиврий тIайлашиврул цIаний талатисса журналистикалул лишанну:
— Жува язиминнацIа хъанай буру. Ми бивкIссания жучIара цукунсса журналистика къадикIанссия…Ми бакъа журналистикагу цамур дур, хIукуматгу цамур дур. ХIажимурад Камалов икIайва ца Ухссавнил Ккавкказнал бакъа, щалвавагу билаятрал язими кказитирттал сияхIравун бухлахисса кказитрал каялувчину, — увкунни ванал.
Хъирив ккаккан дунни ХIажимурад Набиевлул ларсъсса ХIажимурад Камаловлуясса фильм.
«Консолидация – Созидание – Толерантность» номинациялуву цалчинсса кIану буллунни Наталья Крайнован, кIилчинсса – Денис Соколовлун, шамилчинсса – Ирина Гордиенкон. ХьхьичIунсса журналистуран премиярду дуллай бия «Черновикрал» учредитель Магьди-МахIаммад Камалов, АьФ-лул УФАС-лул ДР-лийсса каялувчи Кьурбан Кубасаев, ДР-лул президентнал пресс-секретарь Расул Хайбуллаев. СахIналийн, мукунма, ва кьини махъ лахъан тIий, хьхьичIун ливчуминнан дипломру булун тIий, лавхъунни ДР-лул Журналистурал союзрал председатель Аьли Камалов, журналист Алик АьбдулхIамидов, «Черновик» кказитрал журналистал Биякай МахIаммадов, Темирлан Темикуев, Маирбек Агъаев ва чIявусса цаймигу.
Ва конкурсравух гьуртту хьуминнаву язиминнан ккалли бунни: «Редактор года» номинациялуву Марко Шяъванов – «Новое дело» кказитрал редакторну ивкIсса, «Молодой журналист» – Рамазан Раджабов, «Лучший проект года» – Светлана Анохинал «Был такой город» цIанилусса проект, «Лучшее бизнес-издание» – журнал «Эксперт-Юг», «Лучший Интернет-проект» – интернет-ресурс «Кавказская политика», «Будущее журналистики» – Зухраб Оьмаров ва цаймигу. Премия, диплом ласун сахIналийн увксса гьармагу пахрулий ия ХIажимурад Камаловлущал архIал зий, мунащал дусталну, кIулну цивппа бикIаврия, мунайн цащава «ттул учитель», «ттул дус» учин бюхъаврия.
Ахирданий Максим Шевченкол дурккунни ХIажимурад Камалов уччин лавсун найна цала бакIраву хIасул хьусса назму.
БатIаву къуртал хьуну махъгу биялсса хIал хьуна инсантал шаппа-шаппай къалагавай, бавцIуну, куннащал кув ихтилатру буллай, аьпа биву, ХIажимурадлул ниттищал гъалгъа тIий.
