МахIачкъалаллал маршруткардал шофертурал ният дур февральданул 1-нния махъ багьри ххи бан.
ХIасан Аьдилов
Каспийскалийн заназисса маршруткардахсса багьри ххи бувну бия январьданийва – утти МахIачкъалалия Каспийскалийн маршрутка бацIлай бур 30 къурушран. МахIачкъалалив ми маршруткарду ссан бацIанссарив ттигу кIулну бакъар: шофертал бур 15-ннин тIутIиссагу, 18-ннин тIутIиссагу. Масалдаран на цIухху-бусу бувсса шофернал бувсмунийн бувну, путевкалух утти дулун аьркинни 3100 къуруш, га ххира хьуну дур федерал тарифру ххира хьуну махъ. Ххи хьуну дур транспортраясса налог, страховой отчисленияртту, лахъ хьуну бур соляркалухсса, бензиндалухсса багьри, ххира хьуну дур дукиягу. Ми гьарзатрайну маршруткалухсса багьагу ххи бан багьну бур.
Агьали къаршину бур му ишираяту, цанчирча дукIу октябрьданул цанния махъ бюджетниктурал харжру ххи бан ккаккан бувну бивкIссар, амма ми ххи бунни так цаппара организациярдай. Цаппара учреждениярдаву уттигу ххи бувну бакъар, масалдаран, журналистътуралсса. ЦIана духтуртурал, учительтурал ва цайминналгу харжру бур 5-8 азарда къуруш. Микссава бур чIявуминнал пенсиярттугу. Миннува зуруй 600-700 къуруш дулун аьркинни транспортрах.
МахIачкъалаллал администрациялул бакIчинал хъиривчу Ферезуллагь Кьагьримановлул бувсунни, багьри ххи бансса сававртту душиву. Ганал мукъурттийн бувну, маршруткардахсса багьри ххи бан бюхъайссар 18-нния 20 къурушрайн биянцIа.
«Багьри ххи барчан – бача, амма му чIумал шагьрулийсса жяматийсса транспортгу зузи дача, масалдаран, мюрщисса автобусру (пазикру), гьарза бача троллейбусру. Яла буруганну цуксса хIаллай личIайрив ми маршруткарду. Чан-чанну тIий бакъа-къатIа хьунтIиссар шагьрулия», — тIий бур инсантал. Мяйжаннугу 5-10 азарда къуруш харжиран бусса шагьрурдай 18-20 къурушрансса маршруткарду бушаву къатIайлассар. Циванни маршруткардал шофертурал 30-40 азарда къуруш ласлан аьркинсса, духтурнал ва учительнал – 5-10 азарда къуруш. ЖучIава кунмасса харжру бусса кIанттурдай транспортрахсса багьа бикIан аьркинни 5-6 къуруш, му масъала щаллу бан аьркинни шагьрулул бакIчитурал.
