Тталат кьини, январьданул 29-нний МахIачкъалалив Жяматийсса палаталуву хьунни Ухссавнил Ккавкказнаву дакьаву даврил ва агьалинал ихтиярду дуруччаврил комиссиялул председатель А. Ф. Мукомоловлул Дагъусттаннал журналистуращалсса «ккуркки стол». Шикку гьуртту хьунни ДР-лул ОНК-лул председатель ХIасан Айгунов ва «Содружество женщин» ДРОО-лул председатель ПатIимат Геличова.

Андриана Аьбдуллаева
А. Мукомоловлул бувсунни ва комиссиялул председатель хIисаврай ва цалчинсса аьрххи бушиву цала Дагъусттаннайн, цалва комиссия цинярдагу Ухссавнил Ккавкказуллал республикардай агьалинал ихтиярду дуруччаврил ялув зий бушиву. Бувсунни Дагъусттаннай цува хьунаавкьушиву инсаннал ихтиярду дуруччаврил уполномоченный Уммупазил Оьмароващал ва цаймигу ихтиярду дуруччай органнал вакилтуращал.

[pullquote]ЦIанасса чIумал жул сияхIрайн бувну Дагъусттаннай 150 инсан ур акъа хьусса.[/pullquote]
Ванал бусласимунийн бувну, комиссиялул хьхьичIва-хьхьичI ххал буллан тIий бур ятIа-тIар бакъа бакъахьуми ва ляхълан тIий бур инсантал бацлацисса иширттан ххуллу кьукьинсса чаранну.
— ЦIана гужирдал ведомстварттащал ва инсаннал ихтиярду дуручлачиминнащал жу щаллу дуллан най буру бакъахьуминнал сияхI. Яла лугланну ми бувччусса кIанттурдах. Аьркин дагьларча, база салкьи баву мурадрай, дулланну бакъа хьуминнал мачча-гъаннал генетикалул экспертиза. ЯтIа-тIар бакъа бакъахьуминнал гъан-маччанан, хьхьичIва-хьхьичI ахIвал кIюласса бугьараминнан, жу бантIиссар генетический паспортру (ванал ккаккан бунни мюрщисса щюллисса мужаллатирттащалсса паспорт – А. А.)
Миннуя жул даврин, гьамин бакъа хьуми лякъин, ливтIуну, бувччуми ца буссарив кIул бан кумаг хьунтIиссар. ЦIанасса чIумал жул сияхIрайн бувну Дагъусттаннай 150 инсан ур акъа хьусса. Луглай хъирив лаллан бивкIукун ва сияхI 200-ннайн лахъанссар, — увкунни Александр Федоровичлул.
Ялагу комиссиялул председательнан пикри бур ливтIусса террористурал жаназарду мачча-гъаннахьхьун дуччин къадуллалаврил масъала гьаз бан.
— Ххал бан аьркинни террорист цумарив, къатеррорист цумарив цукун кIул буллай буссарив ихтиярду дуруччай органнал. Дагъусттаннай 233 боевик бат увну ур, миннава террористътуран хIисав увну ур так 11, — увкунни А. Мукомоловлул.
Мукунма комиссиялун дакIний бур ххалдигьин вагьабизмалул хIакъиравусса, гьамин мунин къадагъа дуллалисса закон. Хьуссарив му закондалия уттинин цичIав хайр. Закон зий дакъахьурча, муния мюнпат бакъахьурча му дукьан дан аьркинссар, тIий ур ва. Цалва ихтилат къуртал буллай А. Мукомоловлул махъ буллунни инсаннал ихтиярду ссуссукьу дурсса аваза багьсса иширттал ялув ацIан. Ахирданий ванал журналистурал суаллахьхьун жавабру дуллунни.