1880-1939
* * *
Ина ургайссания,
Ишан кьамул давияв,
Пар учавай, бат шавай,
Хъирив ачин авияв.
Бюхттул зунттай ав хьурдай,
Вил ттупангирал бутан.
Ардарав уртту хьурдай,
Вил оьру чал хъап учин.
* * *
ДахIалай бакъарив
Вай хъуни хъами,
Эшкьилул бувччуну,
Цалий бавцIусса.
ХIалдарай бакъарив
Вай мюрщи душру,
Ччаврил хIал къакIулсса,
Мюрщинувасса.
* * *
Кьабитаннав? Кьабити,
Оьрму оьри къачинна,
Кьалантрал иттацIанттал
Дус цамагу лякъинна.
Ина ттуя арх шаврил
ЛухIи-за лахханххурав?
Вайва лухIи яруннал
Цамагу хIайран анна.
* * *
ЧIунни, аьзиз гьалмагъай,
Эшкьилул дазу рищун.
Бюхттул зунттал дяркъу щин
Мякь къаливххун кьаритан.
Утти ссавур ссуттилнин,
Ссуттил ссавур инттунин,
Ссавур чIа тIий най бури,
Ччаврил ччуччин був оьрму.
Даим ахттакьун чIумал
Вил бава жуннийн дучIай,
Ттул арснах дурсса эшкьи,
АгьитIий, кьарити, тIий.
* * *
Ил лагай шагьраххуллу
КIяла арцул хьунугу,
Вин эшкьи хьунсса кIулну,
Ххуллийх къагьантIиссияв.
Ххуй оьрчI, вил буттал къатта
Ашрапирттал хьунугу,
Вин ччаву хьунсса кIулну,
КьатIув къабуккавияв.
ДурцIуну дур ва ттул дакI
Ккуллардал мажарнияр:
Мажар битай, бачIва шай,
ДакIнин дарман къалякъай.
Хъамаличу учIайва,
ЧчатI букайва, лагайва.
ДикIуву дакI дукансса
Ина акъа къавхьунна.
* * *
Арих нани оьру чуй,
Аьв къюллу мабукара,
Салъяннал зунттуйх найкун,
Буки кисаран чIапIив.
Зунтту зунчала буккай,
Ар микIирала дуккай,
Дуккан дуллай къадуккай
Вил хханххирава ттул дакI.
Гьаваллавух леххайсса
ТIиму мусил итаргуй,
Вил хъирив ялугьаврил
На мурчIи шавай бура.
Эшкьилул ччуччин бунна,
Ччаврил микI лачIун бунна,
Ттигу дурив, итаргуй,
Вил ттун дансса оьшиву.
Бюхттул зунттай ав хьурдай,
Вил ттупангирал бутан.
Зунчалу тIутIи хьурдай,
Вил оьру чал хъап учин.
* * *
Ттул яру битай лачин,
Тти яру щих битлава?
ДакI дачIай бюхттул зунттуй,
ДакIнийсса щихь буслава?
Уртту дакъаний тIутIий,
Ина яру щих битав?
Щин дакъаний щаращий,
На ясирну багьунна.
ЦIу барзнияр чаннасса
БакIраву тIутIул яру,
Утти ттуруллун хьуну,
Мукьал къявхъа тIий бури.
Нясив аннав къачинна,
Аншивугу къакIулли,
Алши бакъа дикIул дакI
Вия личIий дан къашай.
* * *
На шяраву буссаксса,
Шанан къабикIай вирттал,
На шярава лавгукун,
Утти шанул буччира!
На буттанний буссаксса,
Кьяпри иттав ссурахъал,
Буттанния лавгссара,
Утти чIантIай бишара.
Тти хъинну бикIияра,
КкурчIа бувцIу жагьилтал,
Бюхттул зунттал бакIаву
Чятир бищун най бура.
ЧIун архIал мюрщи душрув,
Тти зун барчаллагь хьуннав,
Ар дурцIусса тIутIаву
ТIуркIу ххи хьун най бура.
* * *
Ва ттул дакIнил дардисан
ДачIирча ацIва бутIуйх,
Миннувату ца бутIа
Бутарча майдан ардайн,
Уртту къаххяхханссия,
ТIутIив силул хьунссия,
Къурагьшиву хьунссия,
Гъарал къалачIунссия.
Ттул дакIнивусса дардру
ДачIирча ттуршва бутIуйх,
Миннувату ца бутIа
Бутарча щюлли хьхьирийн.
Хьхьирий щин кьакьанссия,
ХIаврай язугъ хьунссия,
Зунттурду бюхттул хьуну,
Ттурлу къадишинссия.
* * *
Щюлли уртту ччуччайсса
Ссуттил силул дакъаяв?
Бурса бавкьусса цанни
Гъидайдихьулул гьантрай?
Замгьар буран бищайсса
Кьуру кIинттул бакъаяв?
Гъинттулгу ва ттул дакIнийх
Буран бищайсса цанни?
Гьавиявхха макь рутIин
ЧIарах нани Хъуннеххайн,
На руртIу кIири мукьал
Мугьали буккан банссар.
Алвагь дикIуву дакIнил
Дардру пучрайн дичивив,
Дардирдал пуч кIу бувну,
ПаччахIххуллу лекьанссар.
* * *
ОьрчI-оьрчIуннал лахъуни
Ланттулуву бишинна,
Вай шярал хъаннил махъру
Балайлущал гьан банна.
Гьухъа лахъисса банна,
Шярал мукъурттил буцIин.
Лачак хьуннасса данна,
Мукъурттил ялун рутан.
* * *
КIюрххила буккара
На щюлли къурув,
Качарданул чурхгу
Хъюйлчай тIи бувну.
Кьунниял бучIара
Ччувччу къатлувун,
Къиргъулул яругу
КъявхъатIи бувну.
* * *
Бюхттул зунттайн лахъанна,
Пюрундалул чIюй банна,
Чарил нузкьунттив данна,
Чил мукъуя буруччин.
Аман шярах хъу хьурдай,
Шярал мукъурттил дугьан,
Качар чурххай бакъамур
Сил риртун ччуччин буван.
Аьрщарал къатта банна,
Шярал мукъула буххан,
Чарил нузкьунттив данна,
Мукъурттил ялув лакьин.
Гьалмахтурал лахъуни
Лахъ барзунттай бишинна,
Вай шярал хъаннил махъру
Балайлухун гьан банна.
* * *
Була тIий увкIуна Ваччав Хъунбутта,
Булунгу бавцIуна маюрнал Шагьун,
Ттунагу къакIулсса, цIагу къабавсса
ЦIа чарий чичиву, щюлли АхIмадлун.
Бувагу къабивтун, булайсса хьурча,
КIа ШавкIуллал ламу арцул бакьича,
Ялагу къабивтун, булайсса хьурча,
На битан тавхана мусил бувача.
Аьрщи арцулъявав къатта ччуччивул,
КIа ШавкIуллал ламу арцул бавкьуна,
Чару мусилъявав вилах лещивул,
На битан тавхана мусил бувуна.
Ардарав хIавигу хIави бакъая,
ХIави ия, душрув, ттул щюлли АхIмад,
ХIавилий чIапIигу чIапIи бакъая,
ЧIапIаяр щюллия АхIмадлул яру.
ЦIарацIа дияхха цIа духлагивул,
ЦIаниха лавхьхьусса цува акъая.
Аваза бияхха вилах лещивул
Чувшиврул лишанну чурххай дакъая.
* * *
Душру цири литIуннав,
Чил оьрчIах эшкьи дурсса,
Щаза кIийлла дирчIаннав,
Ваччиях ччаву дурсса.
Аьршлул ницал хъирттай
Чирахъру лахълай,
Луглай лякъин къавхьур
Аьршлул чIанулу.
Ссавнил бургъи-зурухь
ЦIуххин лавгссияв,
Лачин лагай ххуллу
Цумурди учин.
Ссавнил бургъи-зурул
Ттухь гъалгъа бунни,
Ссурулккуртлул ххуллийх
Лавгунни, куну.
Махъа бургъил оьрчIал
Леххаву кунни,
Ссавнил буржирдаву
ЦIакь хьунни куну.
