[dropcap]Р[/dropcap]асул ХIамзатовлул цIанийсса Национал библиотекалий хьунни лакрал машгьурсса чичу, 

Дагъусттаннал халкьуннал шаэр Ссугъури Увайсовлул цIуну итабавкьусса «ЦIарду ва цIурду» тIисса луттирал презентация. Мунийн ва кьини библиотекалул конференц-залданувун бавтIун бия чIявусса инсантал. Мажлис бачин бувну ия Шалласу Шалласуев.

Бадрижамал Аьлиева
«ЦIарду ва цIурду» бур лакрал ва цаймигу миллатирттал арсурвавран ва душурвавран хас бувсса лу, авторнал оьрмулуву чIиви-хъунну бусравсса кIантту бувгьусса инсантурая чирчусса назмурдал жуж. Ми назмурдахун авторнал, щалва луттирай къадуварчагу, ишла дурну дур цалла дирхьусса суратругу. Шикку буккултрал хьхьичIун Ссугъури, шаэр хIисаврай акъа, художник хIисаврайгу уклай ур.

Луттираву бур «Тайпалул къяртри» тIисса бутIагу, мунивун авторнал бивчуну бур цала нитти-буттая, кулпатрая, уссур-ссунная, махъсса гъан-маччаминная чивчуми ххару.

ЦIуну бувксса луттирая­сса чIявусса ихтилатру хьуна ва кьини. Шалласу Шалласуевлул дакIнийн бувтуна ванияр шинал хьхьичI вава библиотекалий хьушиву Ссугъури Увайсовлул дирхьусса суратирттал выставка, муниннин так чичу, шаэр хIисаврай кIулну ивкIсса Ссугъури му кьини художник хIисаврайгу чIявучин аьлтту хьушиву.

Презентациялул мажлисрай ихтилатру бувна филологиялул элмурдал доктор Ися Аьбдуллаевлул, Дагъусттаннал халкьуннал чичу Мирза Давыдовлул, педагог, профессор Жанна Абуевал, Каспийскаллал медучилищалул муаьллим ХасмахIаммад ХасмахIаммадовлул, искусствовед Гулизар Султановал, педагогикалул элмурдал доктор Кьурбан Акимовлул, МахIачкъала шагьрулул 16-мур школалул ла­кку мазрал муаьллим ПатIимат Аьлиевал, Лакрал райондалул Хъунилсриннал советрал председатель Даниял Магьдиевлул, Дагъусттаннайсса «Пенсионер» кказитрал хъунама редактор АьвдурахIман Кьурбановлул, Дагъусттаннал халкьуннал шаэр Космина Исрапиловал, муаьллим, педагогикалул элмурдал доктор Ирбагьина ХIасановлул, тарихрал элмурдал доктор Навруз Бивжановлул ва м.ц. Ихтилатру буллалими цинявппагу кIицI лаглай бия Ссугъури Увайсовлул цимивагу гьунар.
Мажлис балайрдайну чIюлу бувна: Жанна Кьурбановал, Ямлихан ХIажиевлул, Зоя Гудовал, Шагьалай МахIаммадовал.
Назмурду дурккуна шагьрулул 16-мур ва 28-мур школарттай дуклакисса лакку оьрчIал.