Дурну диркIссар царай чакмарду
Сталиннунссагу

Жул сумбатIул, муххал ххуллучитал бакъассагу, цIа дурксса уссал усттарталгур. 

Ттул бусаву СумбатIуллал шяравату бувксса уссал усттартурал 4 династиялияр.

1905-кусса шинал Маллаев Гьаруннул Дарбантлив тIивтIуну бур хъун бакъасса усру дувай къатта. Микку зунгу шяравату бувцуну бур щарссанил Къис­ттаманнул уссурвал – МахIаммад ва Камил СултIановхъул. Камил ниттил лякь­луватува ччаннал мушакъатсса ивкIун ур. Никир­ттай ва карунний ятIул луттирал кIараллугу бивхьуну занан икIайва тIар. Муная цIанихсса уссал усттар хьуну ур: Дарбантлия дакъагу, чIаххувсса Азирбижаннавагу муначIан уссал заказру дучIайсса диркIун дур.

1941-43-ку шиннардий Да­гъусттаннал обкомрал шяраваллил хозяйствалулсса буллалисса секретарьну зий ивкIссар сумбатIличу Манапов Камил ХIажибуттал арс. 1943-ку шинал мунан дуллуну диркIссар Лениннул орден. Мунал Москавлив диян дурссар кIицI ув­сса Камиллул дурсса хурум чакмарду – Сталиннун ва дяъвилул чIумал эвакуациялул комитетрал председательну зий ивкIсса Шверниклун. Манапов Камиллул ми усру Сталиннул ва Шверниклул адъютантътурахьхьун тапшур дуллалисса сурат ттун ккаркссар Манапов Камиллул куяв Ибрагьимов АхIмадичIа.

Дарбантлив Гьарунгу, Ма­хIам­мад­гу, Камилгу зузисса ­уссал цех дяъвилул чIумалгу, муния махъгу цIа дурксса цех бивкIссар. Гьарун яла, Лаккуйнай увкIун, Ваччав комбинатрай зий ивкIссар.
Совет хIукуматрал заманнай Ваччав Аьвдурупхъал ва СалихIатлул къатраву уссал цехгу бусса промкомбинат зий бикIайва. Миву зий бикIайва цIа дурксса уссал усттартал – Исрапилов Батир ва мунал арс МахIаммад. Миннал дурсса ­уссал тIалавшинна хъуннасса дикIайва. МахIаммад, уссал ус­ттар акъагу, янна дуруххаврил, кьяпри баврил, чарил, муххал, тIаннул пишакаргу ия.
Жул шяраву гиччава най уна мушакъатсса, ччан вивппай бав­ккусса, ца ччаннал къалип къасаргъунсса, колхозрал, советрал председательнугу зий ивкIсса, ХIусайн Расулов тIисса адамина уссия.

МахIаммаддул дуссия мунал му мушакъатсса ччаннан дурну ххюва ятIигу (молния) бивхьусса чакма.
Ттул вания гихунмаймур ихтилат та Аьвдурупхъал къат­раву промкомбинатрай ­уссал усттарну зий ивкIсса Батирдул чIаххувчу Маллаев Рамазаннуятугу, муная дирзсса уссал ус­ттартурал династиялиягур. Рамазаннул арс Муса, Да­гъусттаннал пединститутрал физкультуралул факультетгу бувккуну, МахIачкъалалив учительну зий ур.

Мусал арсурваврал – Рамазаннул, Гьаруннул, МахIаммадлул цала хъунбуттал (буттал бу­ттал) пиша язи бувгьунни, уссал ус­ттартал хьунни.
Рамазаннул чIивимур душнил Къисттаманнул арснал Лукьманнулгу цала хъунбу­ттал сянат язи дургьунни. Мусал арсурваврал Рамазаннул, Гьаруннул, ссил арснал Лукьманнул МахIачкъалалив цIа дурксса цала-цала уссал цехру зий бур. Миннал дурсса ­уссал тIалавшиннагу хъунна­сса дуссар. Дагъусттаннай дакъа­ссагу, миннал усру, Москавлия, Петербурглия, Норильскалия тIайла хьуну, Аьрасатнал 85 шагьрулийн диян дуллай бур. Мукунна гъансса чил хIукуматирттайнгу диян дуллай бур. Рамазан лахьхьу-цархьхьу Москавлия выставкалияту увкIунни. На СумбатIлив школалул директорсса чIумал, Рамазаннул цимилагу дуклаки оьрчIан ва душваран укра усру дучIайссия.

Мукунма ххуйсса уссал цех, тIивтIуну, зузи бувну бур Раджабов Раджаблул Зулпукьарнал арсналгу. Мунал цехрал усру диян дуллай бур Хасавюртлив, Нальчикрайн, Пятигорскалийн ва цаймигу Ухссавнил Ккавкказуллал шагьрурдайн. Жул шяраву хьхьичIва ­уссал усттарну зий уссия Кьурбанов МахIмуд. Му, комбинатрай къазий цала шава усру дуллай, дакьин дуллай зий икIайва.
РяхцIалку шиннардий, Ва­ччав зий буссия хъинну ххуйсса, агьалинал ичIаллил ва цаймигу мурадру щаллу буллалисса комбинат. ЧIявусса зузалтгу даврил щаллу байва.

КIикку бикIайссия цехру: усру дайсса ва дакьин дай­сса, янна дуруххайсса, кьяп­ри бай­сса, рахIурду буруххай­сса, муххал давуртту дувайсса, ссятру дакьин дайсса, ичIаллил электрооборудование дакьин дайсса, зий бу­ссия даллакханагу. Комбинатрал сий хъиннура ларайсса дикIайва, ХIажиева Камилат (Изил Ками) директорну зузисса чIумал. Мунил райондалул колхозирттавугума бакъасса, ГАЗ-53 автомашина лавсъссия комбинатран.

ЦIанакул ус дакьин дан­сса ду­ссукъаттавагу бакъар райондалий. Комбинат цуппагу ччувччуну бу­ссар. Амма кIанил чIиртту сагънува бур. Хьун­ссия кIа, инвестортал лявкъуну, цIунил ччаннай бацIангу бувну, зузи бан. Гай СумбатIуллал оьрчIалгу муницIун кабакьин­ссия.

Нагу МахIмуд Аьлилов
Аьлиллул арс, пенсионер,
ш. СумбатIул