Каспийскалий Аьрасатнал халкьуннал аслийсса культуралул центрданий хьунни Дагъусттаннайн ярагъуннищал ххявхсса къачагътал ххит бувну 20 шин шаврин хасъсса батIаву.
Му хIадур дурну дия Кадетътурал хьхьирил школа-интернатращал цачIуну.
Бадрижамал Аьлиева
Мажлис бачин бувну бия Центрданул директор Башикар Гадаева. Цилва ихтилатраву ванил кIицI лавгуна терроризм тIисса махъ уттизаманнул инсаннал словарьданувун хъинну оьсса сиккуращал зана хьушиву, му цIанилусса гужирдал дунияллун хъунисса баларду биян буллалишиву.
Ванияр 20 шинал хьхьичI, буттал аьрщи оьсса душманная дуручлай, жанну дуллусса ГОВД-лул начальникнал хъиривчу, Каспийскалиясса Багьауттин Аьбдуллаевлул ва старшина Усманилав Усманилаевлул оьрмурдая бувсунни чIава кадетътурал.
1999-ку шиналсса аьрали иширттая бувсунни Кадетътурал хьхьирил школа-интернатрал хъиривчу Светлана Корниенкол. Тай оьсса кьинирдай бивкIулийн лажин лажинну ивкIсса, аьрали иширттал ветеран, жула лаккучу Насир Бурчакьовлул бувсунни АхIмад Давдиевлул, Халид Мурачуевлул, Мутай Исяевлул, хIакин Эдуард Беланнул дурсса виричушивурттая.
Гай шиннардий милицанай зий ивкIун, Бущихъав тIайла увксса, цIана Кадетътурал школа-интернатрал директорнал хъиривчуну зузисса Жамал Жамалуттиновлул бувсунни гай иширттавухсса цалламур гьурттушиндарая.
Башикар Гадаевал гьарта-гьарзану бувсуна ТIюхчардал шяравалу тархъан дуллалийни виричуну ивкIусса АхIмад Давдиевлуя. Цахьва ина бусурманчура, жу вийн ка къащунну, так ясирну ачу жучIан тIисса боевиктурахь: «Офицертал канийн къалагайссар», — куну, махъунмай битлай, цимиягу боевикгу оьрмулуцIа увну, цувагу душманнал битлатисса ккуллардал кIурчIулттуйн уккан увну, оьрмулул 31 шинаву жан ватандалухлу дуллуссар АхIмадлул, оьрмунияр яхI, ватан ххирашиву хьхьичIун дурккун.
Дуклаки оьрчIал дурккунни виричунан хас дурсса назмурдугу.
