Июльданул 16-нний Дагъусттаннал ХIукуматрай министртурал кабинетрал бакIчи Артем Здуновлул каялувшиврий
хьунни «Мюхчансса ва ххуйсса ххуллурду» тIисса национал проектрал хIакъиравусса батIаву.
БатIаврий махъ лахълай, премьер-министрнал бувсунни му национал проектравун духлай душиву 4 федерал проект. Дагъусттан гьуртту хъанай бур миннувасса шамуннивух: «Ххуллурду», «Ххуллул хозяйствалун лябуккулунсса жяматийсса давуртту», «Ххуллийх заназаврил мюхчаншиву».
Масъалалул хIакъираву хъунмур махъ лавхъунни ДР-лул транспортрал ва ххуллул хозяйствалул министр Ширухан ХIажимахIаммадовлул. Мунал тIимунийну, гьашину ххуллурду бакьин бан тIий бур 57 километралий, 54 куча бакьин бан най бур, мукунна ххуллурдайх заназаврил сакиншинна дузрайн дуккан дан тIий бур 41 кучалий, 2 шагьрулул чIаравсса ххуллурдай, 1 республикалул ххуллу – МахIарамкант – Ахты-Рутул (6 километра). Ми давуртту дурну бакIуйн дуккан дан тIий бур гьашину ноябрьданийнин.
Министрнал бувсунни мукунма 2024 шинал ахирданийнин бишин най бушиву 110 ххуллурдал кьяйдарду лиян даву чIалачIи байсса стационар камерарду, миннувату 32 бишин тIий бур гьашинува.
Республикалул хъуншагьрулий «Ххуллурду» тIисса проект дузрайн дуккан даврил хIакъираву бувсунни шагьрулул бакIчи Салман Дадаевлул. Мунал тIимунийну, хIакьинусса кьини давуртту дуллай байбивхьуну бур шагьрулул 22 кучалий, 6-нний давуртту къуртал дуллай бур.
Артем Здуновлул бувсунни национал проектрал лагрулийсса давуртту бартдигьин аьркиншиву лавайсса даражалий ва цила чIумал.
