[dropcap]М[/dropcap]айрал 11-нний жула билаятрал циняр регионнай чирчуссар «Ххувшаврил Диктант». Ва кьини Дагъусттаннайгу 13 муниципалитетрай диктант чичин хIадур бувну бия 17 майдан.

З. АьбдурахIманова
Ва хъанахъиссар Хъунмасса Буттал КIанттул цIанийсса дяъвилий жула буттал буттахъал Ххувшаву ларсун 74 шин хъанахъисса иширан хасну «Единая Россия» партиялул сакиншиндаралу дуллалисса акция.

МахIачкъалалив Диктант чичлачисса «Аьрасат – ттул тарих» музейравугу ва кьини хъуннасса утта­рашинна дия. Шиккун бавтIун бия республикалул ХIукуматрал къуллугъчитал, ДР-лул Халкьуннал Мажлисрал депутатътал, ветерантал, жяматийсса сакиншиннардил вакилтал, вузирдал преподавательтал, учительтал, студентътал ва дуклаки оьрчIру. Шадлугърал тагьарданий музейравун бувкIми хьунабакьлай ва аьркинмур буслай, «Ххувшаврил волонтертал» цIанилусса суккушиндаравусса жагьилталгу бия хIарачатрай гьарнан кумаг бан.

Жунна цинявннан цакьнира ххира хьусса дяъвилул макьаннахун хъамал хьунабакьлай Аьралий оркестргу бия музейрал майданнив. Диктант чичин бувкIсса бусравсса хъамаллуравух ия ДР-лул ХIукуматрал Председатель Артем Здунов, ДР-лул Халкьуннал Мажлисрал Председательнал хъиривчу СайгидахIмад АхIмадов, ДР-лул жагьилтурал иширттал министр Камил Сяидов ва цаймигу.

Акциялул гьурттучитал барча буллалисса ва акциялун тIайлабацIу чIа тIисса мукъуву Артем Здуновлул кIицI лавгуна Ххувшаврил байран жунна цинявннан мубараксса байран хъанахъишиву.
«Цалла жаннай мяш къавхьуну, хIакьинусса жула оьрмулул цIаний жанну дуллуссар жула буттал бу­ттахъал. Га, мяйжаннугу, билаятрал щала агьлу-ил гьурттуну ларсъсса Ххувшавур. Га дяъвилул тарих ххал бигьаву ва га чIумал хьусса ишир­ттая хавар бушиврулгу жува гъан буллалиссару жула вирттаврачIан, гайннан бухIан багьмуничIан ва ккавкмуничIан», — увкуна премьер-министрнал.
СайгидахIмад АхIмадовлул кIицI бувна проект цурда, ца жула билаятран дакъасса, щалла дунияллунгу агьамсса, куртIсса мяъна дирхьусса душиву.

«ХIакьину, Ххувшаву ласавриву хъунмур гуж, къия ва гьурттушинна Совет аьралуннал дуршиву хъамабитулул буллалисса заманнай, укун агьамсса акция дунияллул чIярусса хIукуматирттай дуваву хъинну тIайлассар. Жува чансса биччибакъулшиву дуварча ва иширах, Ххувшаву ларсъсса жула буттал буттахъал чувшиврийн хаин хьушиврун ккаллийсса тагьар хIасул хьун най дур. Гьич му иш жунма къакьамулссар!» — увкуна С. АхIмадовлул.

Диктант сакин хьуну дия 20 заданиялия. Даву чичингу багьлай бия 45 минутIрал дянив. Суаллу личIийну захIматсса бакъая, хъунмурчIин бия жунна тарихрал дарсирдава кIулсса машгьурми талатавурттаясса ва аьралий ишир­ттаясса.
Шиккува кIицI лаган, Аьрасатнаву ва мунил кьатIув Диктант чирчуну дур 1327 кIанай. Дагъусттаннай акция нанисса майданнай Диктант чирчуну дур 3 азараксса инсаннал. Диктантрал хIасиллу кIул хьунтIиссар июньдалул 12-нний http//диктантпобеды.рф/ сайтрай.