[dropcap]М[/dropcap]айрал 14-нний ДР-лул БакIчи Владимир Васильев гьуртту хьунни АьФ-лул ХIукуматрал Председатель Дмит­рий Медведевлул видеоконференциялул журалий дур­сса батIаврий.
Муний ххал дурунни АьФ-лул Президентнал, АьФ-лул ХIукуматрал Председательнал дурсса цаппара тапшурлугъру. Ххал бивгьунни шяраваллил хозяйствалуву аьрщив ишла даврил, гьавалул транспортрал, оьрчIал цIуллушиву цIакь дайсса бигьалагаврил, мюрщи оьрчIаха аякьа даврил, оьрчIал багъирдал масъалартту.
ХIукуматрал Председательнал тIимунийну, властрал циняв даражардай – министерстварттай, ведомстварттай ва регионнай цIакь дуван аьркин­ссар къуллугърал буржру бартбигьаврил низам. Яла премьернал бавтIминнал хьхьичIун ларсунни 6 социал мяъна ду­сса тапшурлугъ. Цалчинмур дур оьрчIру бигьалагаврил мюхчаншиврулсса, кIилчинмур – гьавалул жамирдай инсантал буцаву сакин даврил информацион системарттацIун дархIусса.
Яла Дмитрий Медведевлул сукку бунни личIину регионнайн багьайсса цаппара масъалартту. Дагъусттаннайн багьайсса ма­съалану хъанай бур 3-7 шинаву­сса оьрчI-бакI оьрчIал багъирдал дузал баву.
ДР-лул ХIукуматрал председатель – ДР-лул дуккаврил ва элмулул министр Уммупазил Оьмаровал бувсунни рес­публикалийсса тагьарданул хIакъираву: «ХIакьинусса кьини Дагъусттаннай зий бур 836 оьрчIал багъ, миннувун занай бур 3-7 шинавусса 95 азаллий 300 оьрчI-бакI. (Цинявппа оьрчIру бур му оьрмулувусса 254 азара). ЦIана оьрчIал багъирдавун яржа бувгьуну бур 18 азаллий 143 оьрчIал», — увкунни вице-премьернал.
Мунил тIимунийну, 2016 шиная шинмай республикалий бувну бур 9 оьрчIал багъ 1278 кIану бусса, миннувату 6 зий бур. Мура чIумал цивппа заллусса арцух бувну бур 4 оьрчIал багъ 300 кIану бусса, миннувату ца зий бур, ливчIми зий байбишинтIий бур шинал ахирданийнин.
Аьмну лавсун, 2016 шиная цIанасса чIумалнин дузал бувну бур 5419 кIану, шинал ахирданийнин уттигу дузал бан тIий бур 2125 кIану.
ХIадур бувссар
ХI. Аьдиловлул