[dropcap]М[/dropcap]айрал 7-нний ДР-лул БакIчи Владимир Васильевлул каялувшиврий хьунни оператив батIаву. Муний гьартану ххал бивгьунни республикалий оьрчIал багъ-яслирду биял бакъашиврул масъала ва ми биял бувансса ххуллурду.
Масъалалул хIакъираву махъ лавхъунни Дагъусттаннал дуккаврил ва элмулул министрнал буржру чIумуйсса бартбигьлагьимур Альбина Аруховал. Мунил тIимунийну, АьФ-лул Президентнал «майрал» хIукму биттур буллай, 2013 шиная 2016 шинайннин Дагъусттаннай бувну бур 108 багъ-ясли, ми баврийну дузал хьуну бур 35 азара оьрчIансса кIанттурду.
Региондалий 2013 шиннардий цинявппагу бувну бур 136 оьрчIал багъ. Амма республикалий ми уттигу биялну бакъар, анжагъ 84% оьрчIал щаллуну бур багъирдавусса кIанттурдал. ОьрчIал багъирдавун яржа бувгьуну бур ттигу 18 азаллий 100 оьрчIал. ЦIанасса ппурттуву республикалий зий бур 836 оьрчIал багъ, миннува 756 бур муниципал оьрчIал багъру, 22 – паччахIлугъралсса, 58 – цивппа заллусса.
Владимир Васильевлул тIимунийну, цIанасса ппурттуву бюджетрал арцух бюхълай бакъар оьрчIал багъру буллан. МуницIунма, махъсса ппурттуву республикалий налогру гьарзану ратIлан бивкIунни, мунияту чара бакъа дузал буван аьркинми масъалартту чулийн буккан буллан аьркинни. Мунал пикрилий, бучIия ишла дуван частниктурал ва паччахIлугърал цачIусса оьрчIал багъру баврил мухIлухIин. «Жунма аьркинни ччясса мутталий буван 22 оьрчIал багъ ва буруганну, цукунсса кумаг буван бюхъан тIий бурив частниктураща», — увкунни республикалул каялувчинал.
Ххал бигьлагьисса масъалалул хIакъираву ихтилат бунни ДР-лул экономикалул министрнал буржру чIумуйсса бартбигьлагьима ХIажи Султановлул. Мунал бувсунни циксса арцу харж дуван бюхъан тIий буссарив республикалул бюджетравату оьрчIал багъру буван.
Оператив батIаврий ихтилат бунни мукунма Дагъусттаннал строительствалул ва ЖКХ-лул министр Малик Баглиевлул, цаппара муниципал сакиншиннардал бакIчитурал. Миннал бувсунни цачIара оьрчIал багъру баврил тагьар цукунсса дуссарив.
ХIадур бувссар
ХI. Аьдиловлул
