Аьли Аьлиевлул цIанийсса лачIун буккаврил турнирданий

Майрал 1-нний Каспийскалийсса Спортрал къатраву хьунни дунияллийх цIа дурксса лачIунукку Аьли Аьлиевлул цIанийсса лачIун буккаврил дунияллул халкьунналдянивсса 50-мур турнир. Майрал 2-нний шадлугърай турнир тIитIаврий гьуртту хьунни ДР-лул ХIукуматрал председатель Артем Здунов.

ХI. Аьдилов
Бяст-ччаллу байбивхьунни майрал 1-нний. Миннуй гьуртту хьунни 23 билаятраясса 250 спортсмен.
Шадлугърай турнир тIитIаврий ихтилат буллай, премьер-министрнал увкунни: «Бусалардавун агьсса лачIунукку, лайкь хьусса тренер ва СССР-данул спортрал усттар, 5-ла дунияллул чемпион, 9-ла Совет Союзрал чемпион Аьли Аьлиевлул цIанийсса лачIун буккаврил дунияллул халкьуннал дянивсса 50-мур турнир хъанахъиссар циняв дагъусттанлувтуран бунияласса байранну. Аьли Аьлиев ивкIссар, цIа дурк­сса лачIунукку акъассагу, хъин-хъинсса лачIунбуккулт хIадур бувсса ххаллилсса тренергу».

Бяст-ччаллу лахъи лавгунни 3 кьини.
Турнирданий ххув хьунни:
Заур Угуев (57 кило), Баджаранг Пуния (65 кило), Дарсам Жяъпаров (74 кило), Артур Найфонов (86 кило), МахIаммад Ибрагьимов (97 кило), Зелимхан Абакаров (61 кило), Разамбек Жамалов (70 кило), МахIаммад Рамазанов (79 кило), Шарип Шарипов (92 кило), Владислав Байцаев (125 кило).