Къучагъшиврул дарсру
Дагъусттаннал ОМОН-лул ва вневедомственный къаралданул зузалт хьунабавкьунни 500-ннийн бивсса личIи-личIисса школардаясса оьрчIащал.
Вайннал бувсунни оьрчIахь цIанихсса жула полководецтурая, аьралуннал къучагъсса тарихрая, мукунма Росгвардиялул къуллугърая.
ОьрчIавун хъунмасса гьавас бувтунни полициялул зузалтрал бувсса ихтилатирттал. Вайннал суаллу чIявусса бия. Цаппарассаннал бувсунни цанмагу Росгвардиялуву къуллугъ буллансса хиял бушиву.
Каспийскаллал 9-мур школалул 4-мур классрал каялувчи Машидат Абакаровал барчаллагь увкунни мюнпат бусса дарсру дирхьусса Росгвардиялул зузалтрахь.
Дуклаки оьрчIру гьакссагу гъирарай вичIи дирхьуну бия бусласимуних. Дуклаки оьрчIалгу хIадур дурну дия зузалтран ккаккан дансса ххаллилсса программа.
Шайрив ярагъ усттарну зузи бан?
Ватан дуруччайминнал кьинилун хасну Дагъусттаннал Росгвардиялул управлениялий хьунни военно-прикладной журалул спортрал бяст-ччаллу.
Микку гьуртту хьунни 7 команда – 119 инсан. Росгвардиялул зузалтрал ккаккан бунни цала бюхъу Макаровлул пистолет ва Калашниковлул автомат ппивгу бувну, батIавриву, 3 километралийсса марш-бросок давриву ва лечавриву.
Росгвардиялул управлениялул хъунаманал хъиривчу, полициялул полковник МахIаммад МахIаммадовлул сипталий Калашниковлул автомат бавтIунни яру лавкьуну.
Ахирданий хьунни яла хIазмур ва яргмур бяст-ччал — архъан кIункIу даву.
ХIасиллу дурну, цалчинсса кIану бувгьунни Каспийскаллал ОМОН-лул зузалтрал, кIилчинсса – «Ястреб» тIисса СОБР-нул командалул, шамилчинмур — транспортращал зузисса ОМОН-лул. МахIаммад МахIаммадовлул, ххув хьусса командартту барчагу дурну, бахшишру дуллунни. Ванал бувсунни, цаймигу спортрал журардугу ххи бувну укунсса бяст-ччал гьарица шинах буллантIишиву.
Ялгъузну къабитан
Буйнакскалийсса вневедомственный къаралданул отделданул зузалтрал арцуйнусса кумаг бунни къуллугърал бурж биттур буллай жан дуллусса полициялул хъунама сержант МахIаммадрасул Закарияевлул кулпатран Зульмиран.
Росгвардиялул зузалтрал оьвкунни ванийн цачIанма. АрхIал вайннал дакIнийн увтунни цала дус, цIухху-бусу бунни Зульмирахь къушлил багьу-бизулия, кумаг аьркин багьлагьисса масъаларттая. Бувсунни чIарав бацIан, ка-кумаг бан цивппа хIадуршиву.
Районнал дянивсса вневедомственный къаралданул Буйнакскалийсса отделданул хъунама, полициялул подполковник МухIуттин Мусаевлул дуллунни кулпатрахьхьун отделданул зузалтрал вайннан кумагран рартIсса арцу.
— Жу жущава шаймур бантIиссар жула зузалал къуш ялгъузну къаличIан, — увкунни ванал.
Зульмирал барчаллагь увкунни цила лас дакIний ушиврухлу ва цила кулпатрах дуллалисса аякьалухлу.
Лажин хIадур дурссар
Андриана Аьбдуллаевал
