«Дагъусттаннал музыкалул панорама»

Февральданул 27-нний Поэзиялул театрдануву хьунни «Дагъус­ттаннал композитортурал музыкалул панорама» тIисса цIанилусса фестиваль тIитIаврин хас дурсса батIаву.

Бадрижамал Аьлиева
Фестиваль дикIантIиссар февральданул 27-нния апрельданул 4-ннийн дияннин. Му сакин дурну дур ДР-лул Культуралул министерствалул, Да­гъусттаннал паччахIлугърал опералул ва балетрал театрданул, Аьрасатнал Композитортурал союзрал Дагъусттанналмур отделениялул.

Республикалий кIилчин дуллали­сса фестивальданул цалчинсса кьини Поэзиялул театрдануву хьунни ккуркки стол. Муний гьуртту хьунни музыкалул ишккаккулт, искусствоведтал, композитортал.
БатIаву тIитIлай, ДР-лул Композитортурал союзрал хъунама Рамазан Фаталиевлул кIицI лавгунни ва фестиваль хъанахъишиву дагъусттаннал музыкалул мяйжаннугусса байран, бувсунни гьашинумур фестивальданул хасшиннардая. ХьхьичIмур фестивальданул шадлугъру нюжмардул дянив най диркIхьурча, гьашинумунилсса зуруйсса лахъи дуккан дуван пикри бувну бур.

Фестивальданул лагрулий хъиривмур кьини Оьруснал театрданул хъунмур залдануву хьунни балетрал вечер.
Зурул мутталий хьунтIиссар личIи-личIисса шадлугъру: музыкалул комедия «Навруз», хорданул музыкалул концерт, Мурад Къажлаевлул творчествалун хас дурсса вечерду ва м.ц.
Фестиваль дайлитIунтIиссар апрельданул 4-нний Къумукьнал театрдануву.