Ца жяматрал ялун цалархIал ливксса бала-апатIрал захIматшивугу бувчIлай, чIалай, «Илчи» кказитрал редакциялул цIаниятугу, цинявппагу буккултрал цIаниятугу дакIру цIуцIисса жижара буллай буру ЧIяйннал щалагу жяматрахь, ливтIу-бивщуминнал гъан-маччанахь.

Зухьхьун ссавур Заннал дулуннав!
«Илчилул» редакция

Декабрь зурул 17-нний ссят 08.40 м. хьусса чIумал Манасрая Серго­къалаливсса ххуллий Маммаев Сослан­ахIмадлул бачин бувсса пассажиртал бу­сса «Газель», пюрун микI хьуну бивкIсса кIанттай шупирнаща байгьин къавхьуну, кьакьалувун багьну бур.

Машиналуву бивкIсса ЧIяйннал шяравасса Сейран Амирова (1989 ш.б.) бу­сса кIанай къуртал хьуну бур. Вара шяравасса КьурбанмахIаммад МухIуттинов ва Сажид Рамазанов къуртал хьуну бур Къарабудахккантуллал азарханалий. ЛичIи-личIисса цIунцIияртту хьуну, азарханалийн иян увну ур машиналуву ивкIсса 13 инсан. ЛивтIуминнавух-бивщуминнавух мюрщисса оьрчIру бакъар.

Багьсса «Газельданул» чIявуми па­ссажирталгу бивкIун бур, Каспийскалийн хъатIийн лавгун, махъунмай Лаккуйн нанисса ЧIяйннал жяматрал агьлу.