ДР-лул БакIчи Владимир Васильев гьуртту хьунни Ухссавнил Ккавкказуллал СМИ-лул Дунияллул халкьуннал дянивсса VI форумрай. «Цифрардал медиа: цIусса хIакьшиву ва ялун бучIанмур» тIисса форум Грозналий декабрьданул 4-6-нний.
Микку гьуртту хьунни округрал редактортал ва журналистътал властьрал органнал вакилтал, жяматрал чулухасса инсантал, экспертътал.
Форумрай ххал бивгьунни «Аьрасатнал ва дунияллул информациярттал пространствалийсса ттизаманнул ххуллу-хха» тIисса масъала. Мунил программалий хьунни сессияртту, ккуркки столлу ва медиамастерскойртту. Сакиншинначитурал тIимунийну, гьашину форумрай гьуртту хьунни 700-нная ливчусса инсантал.
Дагъусттаннал делегациялувух бия ДР-лул ХIукуматрал Председательнал 1-ма хъиривчу ХIажимахIаммад ХIусайнов, информациялул, связьрал коммуникациярттал министр Сергей Снегирев, туризмалул ва халкьуннал касмурдал министр Расул Ибрагьимов, ДР-лул БакIчинал ва ХIукуматрал Администрациялул информациялул политикалул управлениялул хъунама Зубайру Зубайруев ва республикалул журналистътал.
Форум сакин бувну бия «Ухссавнил Ккавкказ» тIисса МЦСИ-лул, мунин кабакьу бувну бия АьФ-лул Президентнал СКФО-лийсса вакилнал аппаратрал, Чачаннал Республикалул БакIчинал ва ХIукуматрал Администрациялул СКФО-рал миллатирттал иширттал ва АСМИ-лул федерал агентствалул.
Мунил мурадну хъанай бия федерациялий СКФО-лул позитивсса чуллу чIалачIи баву, журналистътурал, властьрал идарарттал хIарачатру цачIун бувну, медиаотраслилул агьамсса масъалартту ххал бигьаву, яла хъинми проектру ккаккаву.
ЦIанасса ппурттуву Дагъусттаннай бур 374 СМИ, миннувату 86 – муниципалитетиртталсса. Зий дур 2 телерадиокомпания – РГВК «Дагестан» ва ВГТРК-лул филиал ГТРК «Дагестан», информагентство «Дагестан», 17 республикалул кказит (14 миллатрал мазрайсса). Дагъусттаннай бур 103 кказит, 41 журнал, 48 радиоканал ва 108 телеканал.
ХIадур бувссар
ХI. Аьдиловлул
