Дайдирхьунни цIусса дуккаврил шин. КIулшивурттал кьинилун хасну цинявппагу школарттай хьунни шадлугърал мероприятияртту. Ккурккуллал школалийгу байран лахъа-хъунну хьунни.ЦIусса дуккаврил шин барча дуллалисса ва тIайлабацIу чIа тIисса ихтилатру бунни школалул директор Кьурбан Гъужиевлул, Лакрал райондалул администрациялул бакIчинал хъиривчу Амсаруллахь Къажлаевлул, тарихрал учитель ПатIимат Магьдиевал.
Андриана Аьбдуллаева
Ххарисса оьрчIал дакIурдил чанна лахъан дурсса кунна, дарусса дия кьинигу. Так байрандалул пашманшиву ца дия: чIярусса шиннардил лажиндарай гьашину цалчинсса шин дия 11-мур класс бакъасса, ххялтIану дия дуклаки оьрчIал кьюкьа.
Цинявппагу зунттал районнал школарттай кунма, жучIагу чан хъанай бур шиная шинайн дуклаки оьрчIру. Цила чIумал цинявппа лагма щархъал оьрчIру занай бивкIсса, кIива интернатрай кIанттурду биял къахъанай бивкIсса, кIи-кIива чIарахсса классру бивкIсса Ккурккуллал школалий гьашину дуклантIий ур 45 оьрчI, цалчинсса гюнгутIи бищун тIий бур 5 оьрчIан.
[dropcap]К[/dropcap]ьурбан Гъужиевлул цала ихтилатраву кIицI лавгунни, оьрчIру чансса бухьурчагу, вайннайнсса вихшала хъуннасса душиву, умуд бушиву цала оьрчIалгу, учительтурал ва нитти-бутталгу хIарачатрайну, куртIсса кIулшивурттугу ларсун, вайнная школалулгу, шяраваллилгу цIа-кьини бюхттул дансса инсантал букканшиврийн.
Ихтилатру къуртал хьуну махъ дуклаки оьрчIал дурккунни школалун, учительтуран хас дурсса назмурду.
Хъирив цалчинмур классравун нанисса оьрчIан бивщунни цалчинсса гюнгутIи.
