[dropcap]И[/dropcap]юль зурул 29-нний Кас­пийск шагьрулий дя-дяхтта бакъа хьусса 8 шинавусса Калимат Оьмаровал хаварданул аьраттал буккан бувну бур сайки щалва Дагъусттаннал агьали. Каспийсккалий Генерал Оьма­ровлул цIанийсса кучалий дур Калимат яхъанахъисса къат­ри.

---

[dropcap]А[/dropcap]хттайнмай цала къатрал чIаравсса ттучандалийн лавгсса душ зана къавхьуну бур ва му хIакьинусса кьинигу бусса кIану кIулну бакъар. Каспийскаллал шагьрулий Калимат ххал буллай занай буссия 2000-нния ливчу­сса инсантал. Паракьатну ба­къая соцсетирдавумигу, цинявппагу бия душ лякъаву мурадрайсса дуаьртту дуллай, кIулминнахь ва къакIулминнахь цIухху-бусурду буллай.

Камерарду бусса машинар­ттал шофертурайн оьвчавуртту дуллай, цуманан ци хIисав хьурив ххал бара тIий, хъирив бизлай буссия. КIицI лаган ччива, баччибакъулшиву къадурну, Калиматлул ниттил чIарав бавцIуну, цIанасса ппурттувугу цащава шаймур буллалисса жула инсантурал яхI-къирият.
Паракьатну бакъар орган­нал зузалтгу.

Силистталул управлениялул криминалистикалул отделданул группа тIайла був­ккунни бакъа хьусса душ лякъин кумагран. Му бакъа­ссагу, ДР-лул Силистталул комитетрал органнал ва иширал хIакъираву сукку дунни «в» ч. 2 ст. 105 (оьрчIру оьрмулуцIа буван кьаст лархIусса) статьялийн бувсса уголов делогу.
Хъунмасса умуд бур полициялулгу, цинявнналгу кумаграйну душ сагъ-саламатну лякъинссар тIисса, инша Аллагь.