Лавгру жу Киславрайн, ка магьирсса, дакI чумартсса чувнал Аьлил АхIмадовлул оьвкуну

Дурусну ацIра шинал хьхьичIгу лавгссия «Илчи» кказитрал коллектив кIинттулгу щюллинма­сса, гъинттулгу дюхлулнувасса Кисловодскалийн, ка магьирсса, дакI чумартсса, Гъумучату­сса Аьлил АхIмадовлул оьвкуну. Тихсса лак­ращалгу хьунабакьин, бигьагу лаган. Ттигъаннугу лавгру жу Кисловодскалийн, тава Аьлиллул хъамалу оьвкуну.Тара жухра ацIра шинай ялугьлай диркIсса (ялугьлай духьунссия тIисса тамахI бия) дачалийн. Шагьрулул азарханалул чIаравра духьувкун, ля­къингу бигьасса, зунххисса хху­ллийх нанийни, ваца Лаккуйн нанисса кунма­сса асарду загьир буллалисса. ХIатта дачалийсса тIиртIу ларзнийнгума «Лакку ларзу» тIисса цIа дирзун дур.

---

ПатIимат Рамазанова
[dropcap]Я[/dropcap]лар жул душру дюхлул­сса гьавагу сайки Лаккуй кунмасса бур, уртту-щингу цара-ца дур тIунтIисса. Мяйжанссар, Лаккуйми уртту-щинал кьанкь ляличIиссара дикIай тIий, бястру буллалиссагу чан ба­къая. Ялар жул душру, Дагъусттаннайсса ва Кисловодскалий­сса оьр­мугу, багьу-бизугу цачIу бивхьуну, ххал бигьлантIисса. Чачаннавух хьусса (тихамур ххуллу 100 километ­ралул гъан­ссар) жу мяшну бивкIру, гьай-гьай, тайннал ххуллурдайсса ва лагма-ялттусса марцIшиврий, ранг къалирхсса щюллишиврий, тия-шиясса мурхьирдал авкьатшиврий. ЧIаххулли. Тапаватшивумур дур цамур билаятрайн багьсса кунна­сса! Гьарцагу мурхьирал, хIатта гьарцагу бюрукъатIулгума заллу усса хханссия.

Ххют дайсса мурхьрувагу къа­ливчIсса МахIачкъалалия шикаятрайнувасса жун Кисловодскаллал мурхьирдал кIутIу тIисса кIичIирттавух буклан бириявува буллу мурадну бия.
Кисловодскалийн жу хьхьувай чIалну бивру. Амма, нувщигу шавхьун, цинявннан нахIу бивзсса, гъунттуй, цIарай був­сса гуржи ччатIгу лавсун, жухва ялугьлай лявкъунни жула дус Аьлил. Цува ччянива Кисловодскалий ялапар хъанай унугу, Аьлил мудангу гьуртту шай лакрал оьрмулуву хъанахъи­сса гьарцагу вари чинсса иширавух, мудангу миллатрал культуралул чIарахацIур. Гьар шинах чичай­ссар «Илчи» кказитгу, ядуллай уссар кказит итабакьлай байбивхьуния шиннайсса подшивкагу.

Ца номер бучIан чIал хъанарчагума, оьвтIий, цIухлан икIайссар, ци сававрайри чIал хъанахъисса тIий. Пагьму- гьунар бусса заргал хIисаврай акъа­гу, лакран ва кIулссар миллатрал тарихрал хъирив агьнува­сса, гьарзат кIул буван ччисса патриотнугу, узданну хъамал кьамул бувайсса лаккучунугу. Ца­ппара шиннардил хьхьичI Пятигорскалий Апанни Къапиевлул гьаттай­сса гьайкал вандалтурал муркIа дурсса чIумалгу, Аьлил анавар увкссия гьав лазилакьи дуван – Пятигорскаллал шагьрулул администрация, Дагъусттаннал диаспора сукку хьуннин, ява гьа! Гьалмахталгу лагма лаган бувну, Аьлил Кисловодскалий мизит буллайгур усса.
Вана укун чумартсса ва чантI увкусса инсаннал дачалийру жу мурхьирдал щурщулухун шанма гьантлий яхъанай бивкIсса. ЦачIу-чIарав бушивриягу ххарину.

Хъирив кьини жу лавгру Кисловодскаллал цIанихсса парк­равун. Ва парк шагьрулул визитрал карточкалун ккалли бувай, шиккун къабиярча, Кисловодскалийн бияврин бувагу хIисав къашай. Бусанну тайнначIа маршруткалул багьа 16 къуруш бушиву, таксилулмур багьагу жучIаванияр кьювкьусса бия.
Циняв туристътал нех дирхьуну бачайсса Кисловодскаллал паркмур 1823 шинал був­ссар тIий бур, 966 гектар дур лазиларкьуну, тIутIал чIюлу дурну ядуллай, инсантурал неъмат ласланшиврул. Паркраву жун биялсса лакгу бакIрайн багьунни, мукьва-ххюва кIанай ла­кку мазрайсса ихтилат бавунни. Хьхьувайсса Кисловодск ккаккан лавг­сса Бадрижамаллун ва ванил душнин Киров ва Гулизар Султановхъулгу бакIрайн багьну бия вава паркраву. Паркравурив Нарзаннал Галерея чара бакъа биян аьркинсса кIанур – дарув­сса нарзан щинал нахIала буван. Цаннал «цух увкусса ккунукрал» кьанкь дур чай щинацIа, гаманаллив «бавал буттукьравасса куннасса» кьанкь дур учай. ТIин цукунсса бухьурчагу, кьанкь цукунсса духьурчагу, дарувсса щин дур, хIачIан ччиминнал кьюкьригу ххялтIа дуклай дакъар.

Шиккува бусан, Пятигорскаллал мороженигу нахIусса дур, мяйжанссар, 50 къурушран ца стаканчик.
Бувкру жу 217 жура лелу­ххант­рал ва 900 жура ххяххиярттал бусса паркравух. Магьравун нани­сса кунмасса хху­ллул манзилгу бивтун, бивру жу ХъункIултIутIал даралувунгу. Му ххуллийхсса заназингу дарув­ссар тIий бия, чурххал хIал ххуй бувайссар тIий бия. Укун­сса заназиндалийн терренкур учай (лечебная ходьба). Инстаграмрай ттул арснал (вагуя жущал усса, «полкрал арс» хIисаврай) ХъункIултIутIал даралий тIайланнасса эфирданий тамаша бувми ттухь бия, шанна километра риртун, терренкур дував тIийча, аьсавращал заназисса нагу бивкIра «электромобильданий аьма­ллал терренкур дував» тIий: 150 къуруш дулурча, электромобильданул щупирнал циван къабиян бави парк­рал ца зумания гамунийн. Ссаврунная паркрай тамаша буван ччинан Архъандалул ххуллийх ла-яларай занай дуя фуникулердугу, 250 метралул лахъишиврий­сса. Ххуллул багьагу бия ца инсанная 200 къуруш.

Хъирив кьини, жулва коллегал Андрианал масли­хIатрайн бувну, жу лавгру «Чяйлул къатлувун». Кисловодскалия Чайный Домик личIину архну ба­къая, 10 километра дунуккива, амма му Къарачай-Чаргаснал аьрщарай бия – чIаххувсса рес­публикалий. Тикку ттуршра журасса мураппа дия, цирдагу укра дукан хъанай бия. Амма мукьра-ххюра къуса дишайхту, тухъ бивщуну, ххишала ххал дан хъанай бакъая. Тивун цамур лякьагу ласун дия жущалла, ца дуччайхту, гамур дуцIин. Лаччул мураппагума дия. Ххал дуварду жу мечI ва лимон хIаласса мураппагу, ттарлил ччекьрал мураппагу. Ттарлил ччикьрая ва лаччуя мураппа дувайсса агьлу тачIав ккашилну къаличIанссар, валлагьий. «Гьассар Ккавкказ ябуллан» тIун бикIайсса цаппара къуллугъчитуран къащи хьун­ссия. Чариягу чув хьусса Ккав­кказуллул ччима яуванссар, ччима уччин уванссар. Чайный Дом­рал хханурду кIутIу тIий бия чурчхелардал – ахъвазандалул, сунуврал, къюмайтIутIул, кякандалул сироправусса гьив­хьхьул ва пуннукьрал лиссурдал. Дия ххюцIалла къурушранссагу, ттуршуннинссагу. Мадарасса ларсун, маша буварду жугу.

Чайный Домрал тIилисингу муниву бухьунссия, ци-дунугу машан къаларсун уккай­сса акъая. Муния махъ жу лавгру НицIал жюружанттачIан (Медовые водопады). Ми дур Красный Курган тIисса шяраваллия арх бакъасса кIанттайсса ца неххамачIув. НицIал жюружан­ттая ницI ланцIа тIий бивкIсса ххай мабикIару, миннуй так тамашари бувайсса. Винни-Пухлун ххира нацIушивугу да­къассар ми жюружанттаву дурагу. Аьвзал заманнай вахIшийсса найрдал кюр­тти бувну, ххяллайх ницI экьинай дикIайссия тIар, щинавух хIала хъанай. ХIакьину найрду бакъассар, ницIгу да­къассар, цIамур лирчIун дур. Тай жюружанттал хIакъираву бур цамургу бусала: цIуну ташу бувми бигьалаган, «ницIал барз» цачIу бутан тай кIанттурдавун лагайсса бивкIссар тIар, муниятур тIар мукунсса цIагу ларчIсса. Аьмну ххюра жюружани дия, яла хъунмур жюружани 18 метралул лахъния щин дагьну нанисса дия.

ТIайламур бусан, вай кIанттурду илтIа хьун ччинан, цаппара килорду дарцIан дуван дакIнийнан къулайсса кIанттурду бия: зунххисса, тик бивкIсса, лахIу-ччахIу хьусса кIанттурдал транспорт так виллами ликрир, электромобиллу, дучри шикку пайда бакъая.
Бия шиккува варанттал ппалуя дурсса жуларду, хъачIурду, муму-тамур дахлахисса базаргу. Сайки гьарманал машан ласарду къарачайнал ццихь бусса айрангу. ДакI зия хъанай дия, сурат рищун ччинан, гъан хьуну, сурат рищуншиврул бацIан бувсса варанттуйн ябияйхтугу. Пакьирнайсса зулму ция! «Авлахърайгу варантту тукунмар бикIайсса, ссал балаллий бура, ти­кку танин дуканмурдагу буччинуксса дулайссар»,- тIий бия душру. Су­кку хьунсса ихтияр дакъа­сса кунма, буний бацIан бувсса варанттуй ттун цIими хъанай бия! Авлахърай илкинну заназисса ккашил къиягума малхIанни! Муниятур ттун зоопаркру ва циркругу къаччисса. Щил ци учирчагу, ми хIайвантрансса ва жанавартран­сса дуснакьри!
Шаппай, яъни дачалийнмай, зана хьувкун, жу ххари бувунну Дагъусттаннал шяраваллил хозяйствалул академиялул преподаватель Аслан Къажлаевлул. ДусначIан АьлиллучIан увкIсса ва, жугу ванал дачалий бусса хавар хьуну, тIутIал кацIру ва щикIалатрал плиткарду ларсун, увкIун ия жу хъин битан. Цукунссар яла икIайсса мяйжаннугусса игит, джентельмен! Аман, зун ккаккан хъина, аьралий шадлугърай кунма, кьюкьлуй бавцIуну, ца-цаних тIий, хьхьичIун буклай, тIутIив ласласисса жул душру! Хъамакъабитайсса лахIза!

Хъунмасса барчаллагь жун укунсса тирххандарал лахI­зарду пишкаш бувсса Аьлил АхI­мадовлунгу, Аслан Къажлаевлунгу. Мукуна барчаллагь-бусраврал ххуллий кIицI ан ччай буру Гьун­чIукьатIрал СПК-лул председатель Сиражуттин Чавтараевгу, Киславрайн бачин хьхьичI ххуллухъиндаран жун ххуллийх ласун хIайвандалул щаллусса ххан­хха буллусса. Мукунма жу хъунма­сса барчаллагьрай буру, ваца бу­сса оьр­мулий жущала ца коллективраву зий ивкIсса куна, хIала увххун, цала дахIалай чинсса маршруткалий жу тихунмайгу, шинмайгу бувцусса 2-мур ЦIувкIратусса Тажуттинов Тельманнуйн. Ванал жун хъин­сса шашлыкругу дуруна, гьармунил усттар ия, уздан­сса чув ия. Уттигу, чувчIав аьр­ххи багьарча, вава Тельманнущал ччива тIисса асарду жул дакIурдиву кьабивтуна.

Киславрая махъунмай бачин хьхьичI жу хьунабавкьуру ччяния шинай тIайлабацIу буну ва чIявучин кIулну-бусравну тикку яхъанахъи­сса жула лаккучу, ГьунчIукьатIрал шяраватусса Жабраиллул арс Сиражуттин Къардашовлущал. Ва ур строительствалул аралуву чIалансса лябукку буну къуццу тIисса бизнесмен. Жу хъамалугу хьуру ванал цала проектрай бувсса, итталу дацIансса исвагьишиву ялттусса къушлий. Сиражуттиннуя ласарду махъгу ялун­сса шиналсса «Илчилул» подписка Киславрайсса лакрал дянив бювхъуссаксса гьарза-гьартану дан­сса. Киславрай тIурча, хIакьинусса кьини хIисав хъанай бур лакрал 160 къатта. Къачаннихха!.
Чун гьарчагу, коллективращал архIал лавгмур аьрххи мудангу тяхъасса, хIал бавкьусса, кувннал кувннахсса ччаву цIакь дуллалисса шайхха. Мукун хьуна ва базилухгу. Зана хьуру жугу, кувннал кувннах­сса ччаву ва хIурмат ххишала хьуну. Жулва бавкьусса, нахIусса коллектив бушиврийн щукрурдай ва му нахIушиву абадлий личIаннав тIисса дуаьрттай.