240 миллиондалун кIанттай – 900 миллион
Дагъусттаннал БакIчинал кIанайма Владимир Васильевлул планеркалий дащуй дирхьунни республикалул школартту луттирдал дузал баврил даву.
Дуккаврил ва элмулул министр Уммупазил Оьмаровал бувсунни тагьар мяйжаннугу цIа дансса дакъашиву, 2011 шиная 2016 шиналнин министерствалул машан лавсшиву 1-6 классирттансса луттирду ва 2017 шиналнин 7-11 классирттансса луттирду машан къаласайсса бивкIшиву. Бувсунни 2017 шинал луттирду машан ласлансса кьутIи дуршиву шанна идаралущал: ООО «Русское слово», ООО «Дрофа» ва АО «Издательство «Просвещение».
Ми луттирду ласун харж бувну бур 913 миллион. Лавсун бур 2,4 миллион луттирдал, ми хъанай бур аьркинссаксса луттирдал 61%. 2017 шинал 1-11 классирттансса луттирду машан лавсун бур, ва харж бувну бур так 240 миллион, миннуватугу 2015 ва 2016 шиннардил лахъаву дуван – 153 миллион, мукунма 2017 шиналсса контрактрахлугу – 86,8 миллион. Луттирдал щаллушинна дуллалисса поставщиктуран 827 миллион бурж бусса бур.
Уммупазил Оьмаровал бувсунни цаппара районнай луттирду «аьркин дакъа гьивуну» ливчIсса тагьар душиву, масалдаран, Агъуллал райондалий ингилис маз куртIну лахьланминнансса луттирду, Бущихъиял райондалийн тIурчарив, ххишаласса луттирду гьан бувну бушиву. Гьаннайсса, библиотекарттал фондирттал анализ къадурну душиву.
Владимир Васильевлул финансирттал министр Юнус Саадуевлухь цIувххунни, бюджетравату 240 миллион ккаккан бувну бунува, луттирду машан ласун 900 миллион харж бувсса иш цукун хьуссар ва циван хьун бюхъайсса ишри му куну.
Агана билаятрай луттирдал щаллушинна духьурча школарттай 98%, жучIара 58% дусса дур, дуккаврил системалуву тамашасса ишру хьуну бур, къабикIан аьркинсса, ми иширттал хъирив лаян аьркинссар, — увкунни В. Васильевлул.
Совещаниялий ихтиярду дуруччай органнахь маслихIат бунни базаллаву бахлахисса луттирдал хъирив бизан, ми ча лавсъсса, базаллавун цукун багьсса луттирду бурив кIул буваншиврул.
