[dropcap]И[/dropcap]нсантуран социал зумунусса ка-кумаг баврил закон кьамул дурния шиннай хIасул хьуссар диялсса хIаллихшиннарду: оьрчIру чIявусса кулпатирттан, маэшат кIюласса кулпатирттан; инвалидсса оьрчIру бусса кулпатирттан, захIматсса тагьарданухун багьсса оьрчIан, ургала акъа ливчIсса оьрчIан, бугьарасса, мушакъатсса, цивппалу ливчIсса инсантуран.
Закондалий ккаккан бувну буссар миннан байсса мудансса, чIумуйсса ва анавар­сса кумагру.
Мудан байсса кумагруну хъанахъиссар: щинал буцIаву, къатта-къуш лакьаву, дарув ласаву, дукра даву, базар ба­ву, токрах арцу дулун лагаву ва м.ц. ЧIумуйсса бай­сса кумагруну хъанахъи­ссар: къабувчIлачIисса ма­съала, къакIулсса закон, цайми-цаймигу затру, учиннуча, юристнал, психологнал, цама специалистнал бувчIин баву.

Анаварсса кумагну хъанахъиссар: инсан захIматсса иширахун агьну, арцуйну­сса кумаг аьркинну ухьурча, му баву.
КIицI лавгсса кумагру бан ккаккан бувну бур, му инсан адамина ягу хъамитайпа бунугу, ци журалул, ци оьрмулул, ци миллатрал унугу, чув ув­сса, ци дуллалисса, ци диндалул унугу, муних къабурувгун.
Инсаннан байсса социал кумагру бур укунсса:
багьу-бизулул — укунсса кумаг аьркинсса инсаннал багьу-бизу ххуй бан, бигьа бан аьркинссар;
хIакиннал — цIуллу-сагъ­шиву дуруччинсса, аьркинсса дарув-дарман бансса кумаг;
муаьллимшиврул — инсаннан къакIулмур, къабувчIлачIимур бувчIин бансса кумаг;
захIматрал — инсаннан зун­сса кIану лякъинсса, му ссаха-унугу зузи ансса кумаг;
тIайлашиврул — инсаннан паччахIлугърал законну, законнацIун бавхIусса къабувчIлачIимур бувчIин бансса кумаг;
компьютерданий зун, интернетравун, соцсетирдавун уххан, миннуву зун лахьхьин бансса кумаг.
гъилисса дукралул, дукра дансса сурсатрал щаллу бан­сса кумаг;
янна-уссал, чара бакъа аьркинмунил щаллу ансса кумаг;
аьркинсса, миннаща щаллу бан къабюхълахъисса масъала щаллу бансса кумаг;
мукунма, чIарав бацIаву, дакI хьунмур бусаву, тяхъа баву, бялахъан баву, дунияллиягу, оьрмулиягу ххари хьун баву, ссахчIав мюхтаж буккан къабитаву.

И. АхIмадова,
Лакрал райондалул ЦСОН-далул зузала