[dropcap]Л[/dropcap]акрал театрданул хIадур буллай бур Дагъусттаннал халкьуннал шаэр, чичу, драматург ва таржумачи Сибирбаг Кьасумовлул «Оьтту ва макь» тIисса трагедия. Ишру хъанай бур, мяйжаннугу Дагъусттаннал тарихраву хьусса кьурчIисса ва лухIисса кьинирду гьануну ларсун, 1877-ку шиналсса бунтраясса бусавуну.
[dropcap]П[/dropcap]аччахIнал хIаписартурал ва кIантту-кIанттурдайсса бакIдургьуминнал буллалисса зулмурдугу, рахIму бакъашивурттугу духIан къахъанай, Дагъусттаннал халкь гьаз хьуну бивкIссар. Бунтрай гьуртту хьусса миллатирттал дакIмяшсса, язисса арамтал щала вихну къабивкIхьурчагу, ярагъуннилгу балгусса, паччахIнал аьралуннаяр бунт дурми ххув хьуншиврийн.
[dropcap]М[/dropcap]иллатру гьаз хьуну, майданнив бувккукун, миннал яхI-намусрал кьамул къабувну бур хIала къабувххун тинмай бацIан. Авторнал ккаккан буллай ур бунтрал каялувшиву дуллалиминнавугу, талатиминнавугу чIявусса жула лакрал цIадурксса тухумирттал арамталгу бивкIшиву. Масалдаран, ласурча, Гъумучатусса Парамазхъал, Къячахъал, Рашкъухъал ва цаймигу тухумирттал. Агъларханнал арс ЖахIпар – баггу, лагма щархъая Будугъал Мусигу, Ккурккуллал Зайдугу, НицIавкIуллал НухIгу, цIа дурксса виричу Пятааьли-баг ва чIявусса цаймигу бивкIшиву. Миннавагу кув ттупал ва ттупангирттал кьатI бувну, кув аьс бувну, кувгу, махругу дирхьуну, Сибирнавун тIайла бувккун бур.
ЧIявучиву машгьурсса «Вай ци ххитри ххуллийхсса?» тIисса халкьуннал балайгу вайннахассар, тай чIуннардийва вайннан хас бувну бивкIсса.
[dropcap]М[/dropcap]иллатирттал яхIгу, намусгу ччанналун къабутан гьаз хьуну бивкIсса чиваркIуннал цIарду дакIнийн дутлатийнигу, жула тарихраягу, миллатрал бакIрачIан бувкIмуния гъалгъа тIутIинийгу, хъамабитан къабучIир чил мурадру щаллу бан зунттавун тIайла бувккун бивкIсса паччахIналми аьралитураягу чансса къабивкIшиву чил аьрщарай гьаврду нясив дурсса оьруснал миллатрал арсругу.
[dropcap]М[/dropcap]унияту ялун нанисса никиран, тарихраясса ахттар душиврущал, лавгмунил дирхьусса дарсру бучIантIимур оьрмулухсса къулагъаснугу, куртIсса ургъилнугу бикIаншиврийнсса умудращал хIадур буллай бур театр ва тарихравасса пьеса.
Гулизар Султанова,
Аьрасатнал магьирлугърал лайкь хьусса ишккакку
