[dropcap]О[/dropcap]ьрчIру буруччаврил кьинилун хасну хьунни «Кулпатрал парад». Мунивух гьуртту хьунни ДР-лул ХIукуматрал председательнал цалчинсса хъиривчу Анатолий Карибовгу. Шагьрулул хъунмур майдандалия бавчуну, му парадрай гьуртту хъана­хъисса 500-нния ливчусса инсантал, Р. ХIамзатовлул цIанийсса проспектрайх най, бивуна М. Горькийл цIанийсса Оьруснал театрданул хьхьичIун.

---

Бадрижамал Аьлиева
[dropcap]Р[/dropcap]еспубликалул бакIчи Владимир Васильевлул ва ХIукуматрал председатель Артем Здуновлул цIанияту ОьрчIру буруччаврил кьини цинявннахь барча дурунни Анатолий Карибовлул.
ОьрчIру тарбия бавриву ва шяраваллил хозяйствалуву хьхьичIунсса цаппара кулпатирттан ванал буллунни Барчаллагьрал чагъарду ва бахшишру.

[dropcap]Б[/dropcap]автIминнал хьхьичI мукунма ихтилатру бунни МахIачкъала шагьрулул бакIчинал буржру чIумуйну биттур буллалисса Абу­ссупиян ХIасановлул, Щалагу Аьрасатнал Халкьуннал фронт­рал Дагъусттаннайсса региондалул штабрал член Жамбулат МахIаммадовлул.

Ихтилатирттая махъ микку хьуна Республикалул оьрчIал художествалул творчествалул VIII фестиваль «Зунттал оьрчIру» («Маленькие горцы ») ва МахIачкъала шагьрулул ОьрчIал филармониялул концерт. Байрандалул лагрулий хьуна оьрчIал кIира арт-проектгу – «ОьрчIру дуниял дихьлай бур» ва «ХьхьиричIасса шагьру» тIисса.

«Зунттал оьрчIру» фестивальданувух гьуртту хьунни респуб­ликалул районнаясса ва шагьрурдаясса оьрчIал творчествалул коллективру, цивппа-цивппалу балайрду щаллу буллалисса ва назмурду ккалаккисса оьрчIру. Мукун, Ккуллал райондалий­сса Ваччиял шяраваллил школалул дуклаки оьрчI Аскандар ХIаммакуевлул пасихIну, дюхханну дурккунни Бадави Рамазановлул «Ттул чIивисса миллат» тIисса назму.

[dropcap]Б[/dropcap]айрандалийн бавтIсса оьрчIру тяхъа буллай бия «Байраннал фабрика» тIисса цIанилусса компаниялул аниматортал.
Вай шадлугъирттал сакиншиндаралсса бувну бия ДР-лул Культуралул министерствалул, Республикалул Халкьуннал творчествалул къатлул, МахIачкъала шагьрулул администрациялул ва Культуралул управлениялул.

* * *
Дусшиврул къатлул хьхьичI­сса майданнив хьунни «Асфальтрай дирхьусса сурат» цIанилусса конкурс, «Тяхъасса хIакин» проектрал аниматорталгу гьурттусса концертрал программа.
Дусшиврул къатлул жа­нахIраву тIиртIуну дия Да­гъус­ттаннал миллатирттал янна-калун, тарихран ва культуралун хас дурсса оьрчIал творчествалул выставка.

* * *
ОьрчIру буруччаврил кьинилун хасъсса шадлугъру хьунни Ссихьрал театрданул хьхьичI, Родопский бульварданий ва шагьрулул чIявусса цаймигу кIанттурдай. Ва кьини шагьру тачIав бакъачIин бувцIуну бия ярг-яргсса яннардавусса мюрщулт­рал, миннал нитти-буттахъал, магьравасса ва мультикирттавасса персонажирттал.