[dropcap]М[/dropcap]ай зурул 21-нний Ккуллал шяраваллил библиотекалий хьунни лакрал чичу Зияуттин Айдамировлун 90 шин шаврин хас дурсса кьини.

ХIажимурад ХIусайнов
[dropcap]Ц[/dropcap]умарив ца аькьлукарнал куну бур: «Дуниял жула лагма дакъарча гьанагьисса, жувару ганил лагма гьанагьисса», — куну. Элмулул дуниял тIитIиншиврул аьркинну бикIай чIявусса луттирду буккин. Цал луттирду ккалан ххира хьуманаща къаккалай ацIангурив къашай. Луттирал кьанкь – му бусан къашайсса, тIааьнсса бухарну хъанан дикIай. Шиккугу: «Луттирал лагма жува бакъача, га жула лагма гьанагьиссар», — учин бучIир.

[dropcap]К[/dropcap]куллал хъуннасса шяравалу. Шикку шяраваллил администрациягу, культуралул къатригу дусса махIлалий бур шяраваллил библиотека. Ва библиотека цуппагу хIисавссар райондалий­сса яла чIявуми буккултрал нуз тIитIаймурну. Шикку шайссар бувккусса луттиран хас дурсса дискуссияртту, шайссар шаэртурал, чичултрал творчестварттан хас дурсса батIавуртту, байранну.

[dropcap]В[/dropcap]а библиотекалул хъунмурну зий бур МахIаммадлул душ Аьйша ХIажиева. Ванин цилла даву ххуйну кIулли. На махIаттал хъанан икIара ва хъамитайпалул карчI дакъашиврий. Шяраваллил жямат, школалул дуклаки оьрчIру цила давурттавух гьуртту хьун буллай, луттирахсса ччаву вайннаву лещан къаритан жан дулун хьусса хъамитайпа бур Аьйша.
Вана, уттигъанну, май зурул 21-нний на бакIрайн агьунав шикку дуллалисса лакрал чичу Зияуттин Айдамировлун 90 шин шаврин хас дурсса кьинилийн.

ХIажиева Аьйшал библиотекалувун бавтIсса дук­лаки оьрчIахь бувсуна Зияуттин Айдамировлул оьрмулия, мунал канила дурксса чичрурдая. Бувсуна гъира бутанну, вичIи дирхьуминнан дакIний личIанну.
Муния махъ оьрчIал бувккуна Зияуттин Айдамировлул шеърирду ва юморескартту. ОьрчIал мукунма ккаккан бувна «ЯтIул кьяпа» тIисса магьлул инсценировкагу. ОьрчIру хIадур бувну бия Ккуллал кIилчинмур школалул учительтурал – Чупанова Гуржигьаннул ва Аьдуева Камилатлул.
Бувсуна ттухь Аьйшал библиотекалул тарихрая.

— Ккуллал шяраву 1930-ку шинал тIивтIуну бивкIссар изба-читальня. Ганий каялувшиву дуллай бивкIун бур Аьлиева Сарижат. 1940-ку шинал тIивтIуну бур шяраваллил биб­лиотека. Мунил хъунмурну зий бивкIун бур Оьмариева Папу. Гьай-гьай, личIи-личIисса шиннардий библиотека бивкIун бур личIи-личIисса къатраву. Ва цIанасса кIанттайн бивзун бур 2004-ку шинал. ЦIана шиву бур 14 азаруннийн бивсса луттирду. Жу ми, буккултран личIи буван бигьану бикIаншиврул, бивхьуну буру цала-цала арарду хIисавравун ларсун: оьрчIал литература, исвагьи литература, медицина, шяраваллил хозяйствалулсса, техникалулсса ва цаймигу.

Дуссар мукунна циняв луттирдал картотекагу. 2010-ку шинал, райондалийсса циняв библиотекартту цачIун бувну, ца юридий идара бувния махъ хъинну ссуссукьу хьунни жул библиотекалул фонд. Утти жун жучIава буми луттирду ябуллан, тIавтIми, списать къабувну, бакьин буллан багьлан бикIай. Бусравсса давуну шаван­ссия, жула лакрал чичултрал цала луттирду Лаккуйсса шяраваллал библиотекарттан бахшиш булларча, гьан булларчан.

[dropcap]Н[/dropcap]а библиотекалуву зий бура 1973-ку шиная шинмай. На къуртал бувссар МахIачкъалаллал культпросветучилищалул библиотекалул отделение. Библиотекалул хъунмурну зий бура 1980-ку шиная шинмай. Ттул ур шама арс ва ца душ.
Ттущал хъачI-хъачIрай дирхьуну зий буссар Маммаева Зоя ва Алхасова Сапижат. Сапижат гьашину бувкIунни библиотекалий зун. ТIайланма учинна, ца ттущаралу дачин дуван къахьун­ссия ва хъунмасса библиотекалул даву, вай ттула чIаравсса уртакьтал къабивкIссания, — тIий бур ва.
Буниялагу, шикку зий бур цала даву ххишала дакъа ххирасса ва кIулсса инсантал. Библиотекалул бухкIуллуйх зу ша ласайхтува, зун чIалантIиссар чIюлу бувсса зал, Аьра­сатнал ва Дагъусттаннал чичултран хас дурсса стендру.Тивунмай буссар луттирду ябай къатри, цивгу хъинну лазилавкьусса. Цимигу барчаллагь хIалалли вайннан.