ХIарачат буллалу, Аьйшай!

МахIачкъалалив, Шахматирттал къатлуву, хьунни школалийн гьаннинсса ва 1-мур классраву дуклакисса оьрчIал дянивсса шахматрай буккаврил турнир. Шикку гьуртту хьунни Дагъусттанналшагьрурдаясса ва районнаясса 100-нния ливчусса оьрчIру.


А. Аьбдуллаева
Турнир хас дурну дия Таджикнаву къуллугъ буллай жан дуллу­сса аьраличу-интернационалист МахIаммад Айгумовлул аьпалун.
Мероприятиялул сакиншинначиталну бия ДР-лул КIулшивуртту дулаврил ва элмулул министерство, А. Маркаровлул цIанийсса республикалул оьрчIал спортрал школа, Спортрал, туризмалул ва жагьилтурал иширттал комитет, Республикалул Шахматир­ттал къатта, мукунма Айгумовхъал кулпат.

Бяст-ччаллаву гьуртту хьун­тIисса оьрчIру бавчIуну бия личIи-личIисса группардайх. ЛичIи бувну бия школалийн къалавгми ва 1-мур классраву дуклакими оьрчIру ва душру, мукунма шагьрурдаями ва районнаями. ХIасиллу дурну, 24 хьхьичIунсса кIану хьунни.

Турнирданий гьуртту хьунни ЦIуссалакрал райондалул ЦIуссаккуллал 2-мур школалул 1-мур классрал дуклаки оьрчIал командагу. Командалуву бия Аьлиева Аьйша (1«а» класс), МахIаммадов Рустам (1«в» класс), МахIаммадов Хамид (1 «б» класс).
Республикалул районнаясса оьрчIаву 3-мур кIану бувгьунни Аьлиева Аьйшал. Ванин дуллунни грамота, медаль ва арцуйну­сса бахшиш.