[dropcap]И[/dropcap]сул Нину тIисса хъами­тайпа бивкIун бур Гьун­чIукьатIув, мазрал пасихI­сса, махъ усттарну бусайсса. Ца цамур Мамил ПатIима тIиссагу бивкIун бур мукунма мазрал бавцIусса.

[dropcap]Г[/dropcap]ьаманки, Мамил ПатIимагу, Исул Нинугу щарнил жяматран пикри хьуну бур Щурагьату Гъумукун нанисса губернаторнал хьунийн буккан бан, ганахь аьрза буккиншиврул. Аьрзагу ЧIанкIихъал цала ятту бакьлай, жяматрал зун­тту канай, цичIав бан къахъанай бур тIисса бивкIун бур, Гъумуксса хъуниминнал ЧIанкIихъая лулттурасса ласлай бушиврийн бувну.

https://www.youtube.com/watch?v=MclWNcTe4Xc&feature=youtu.be
ПIайтIундалий нани­сса губернатор хьунаакьин щарнил жямат Щури-къурув був­ккун бур. ПIайтIун дацIайхту, Мамил ва Нинул бувсун бур таржумачинайхчIин цалла къумашиву. Губернаторналгу, «хорошо», «хорошогу» куну, ка кIутIу дурну дур, пIайтIунчинахь ачу тIисса хIисаврай.

«Хорошо, хорошо» тIисса махъру баяйхту, Мамил ПатIима хъит куну, къурух кIихунмай бавчуну бур, ссаярив ххиву­сса кунма. Агьалигу, махIаттал хьуну, ва чун ливхъун нани­ссар тIий бивкIун бур. Губернаторгу лавгун, шагьраххуллия шаппайн зана хьуну махъ ПатIимахь цIувххуну бур: «Ина циван ливхъра?» — куну. «Циван къалихъавияв, ганал на Карашах тихунмай гьан банна тIий, тIайла букканна тIий ияхха. Ххал барча, «хорошо, хорошо» кусса губернаторнал махъру ганин «Карашав, Карашав» тIисса кунма бувчIуну бивкIун бур.

Аьй ттуйра хьунни

Хъуна Аьдулав тIисса ца дянивсса даражалул машачи Лаккуяту Кьубаннайн лагай­сса ивкIссар, вилцIуннуй чухърал гьивугу дурну. Гай чухъригу Кьубаннай станицардай ялапар хъанахъисса къазахънан даххайсса диркIссар. Му куццуй, ца станицалия гамур станицалийн занай, цала къушлин маэшат буллай ивкIссар. Ца ххуллух мукун нанисса чIумал, ливккун ур ца щаращучIа, ахттайн чакгу бувну, игьагу лаганшиврул. Чаклийн исласисса ппурттуву, цала канийсса мусил кIисса ливккун щаращул чIаравсса чарий бивхьуну бур.

[dropcap]Ч[/dropcap]ак буллалисса чIумал щаращул чIаравсса мурхьирал къяртлуй ца чIелму бивкIун бур «вичIу-вичIу» тIисса макьан дурцуну. Аьдулав, чакгу бувну, буртти ивкIун вилцIуннуйгу, авчуну ур цала ссапарданий. Цаппара ххуллу битайхту, ганан хавар хьуну бур цала каний кIисса бакъашиву, ти­ккува щаращучIава ливчIшиву. Мугьлат бакъа зана бивтун вилцIунгу, увкIун ур махъунай щаращучIан. Амма цала бивхьусса кIанттай кIисса къалявкъуну бур. Пикрирдавун агьсса Аьдулавл чайва тIар: «Бия­хха кIа чIелму «вижу-вижу» тIий, ци вижур куну, ахттар къадур­ссия нара, аьй ттуйра хьунни», — куну.

Инаварив къуппи бура

Цал шяравату архсса къурув лавгун бивкIун бур Унни тIисса хъамитайпа хъу ттихIин. Хъув бияйхту, чантайлуву мирхь къалявкъуну бур. Ана-анаварну зана бивкIун бур Унни шаппайн мирхьирал хъирив. Шяравун буххавайсса кIанттай мунин хьунаавкьуну ур Давди тIисса шяравучу.
— Унний, кIюрххи-кIюрххила ча бавура? — куну бур Давдил.
— Мирхь хъамабивтун, ша­ппайн най бура ласун.
— Инаварив къуппи бура, мирхьрив вил бурхIай бур, — куну бур Давдил. Ххал барчан, мирхь дарвачрах бакIрайсса карщул ланттуй бавхIуну бивкIун бур.

Чивчуссар
А. Аьбдуллаевлул