[dropcap]М[/dropcap]убараксса Рамазан зурул гьантрай Ккурккуллал шяраву дайдирхьунни «МарцIсса улча» тIисса цIанилусса экологиялул марафон. Ва ххаллилсса акциялул сиптачи ва сакиншинначи хьунни «Ккурккул» тIисса чIаравбацIулул ва социал лябуккулул фонд. Ва фонд сакин дурну дур Москавлив ялапар хъанахъисса ишбажаранчи, Ккурккуллал шяравасса Гиланил арс СалихI ХIажиевлул сипталий.

---

Андриана Аьбдуллаева
[dropcap]В[/dropcap]анил мураднугу бур шяраву магьирлугърал ва социал проектру щурущи даву, ялун нанисса ник буттал улча ххирану тарбия даву.
ХIакьину фондрал хьхьичIххуттайн лавсъсса масъала бур шяраву жула халкьуннал тIул-тIабиаьтран лайкьсса марцIшиву даву. Экологиялул акциялул лагрулий шяраваллил кIичIирттаву, ккурчIай, хIатталлив марцIшиву дан ккаккан бувну бур. Му мурадрай шяравалу дарчIуну дур ряхва махIлалийх. Вай давуртту дурну къуртал хьуну махъ, жяматийсса советрал, гьарица махIлалий дурсса даву ххал дурну, кьимат бищунтIиссар ва хьхьичIун лирчусса командарттан дулунтIиссар призру. Мукунна бахшишру дантIиссар марцIшиврул марафондалий чялишсса гьурттушинна дурминнангу.

[dropcap]А[/dropcap]кция дайдишин цаппара гьантрал хьхьичI шяраваллил махIлардай дирхьунни ччюрк дичинсса контейнерду. Му ба­къассагу, лавсунни ччюрк экьидичлансса ттизаманнул машина. Экологиялул акция Ккурклив най дикIантIиссар июнь зурул 30-ннийн дияннин. Июль зурул 1-нний шадлугърал даражалий Ккурккуллал жяматрал тIайла буккантIиссар эстафета цамур шяравун. Укун эстафета бачин бувну, экологиялул марафонну хьунтIиссар цаймигу шяраваллаву.

[dropcap]А[/dropcap]кциялул лагрулий мукунна хьун­тIиссар «МарцIсса улча» цIанилусса дуклаки оьрчIал дянивсса сурат дишаврил конкурсгу. Мунил хIасиллугу дантIиссар июль зурул 1-нний. ХьхьичIунсса кIанттурду бувгьуминнан дулунтIиссар бахшишру.

[dropcap]К[/dropcap]курккуллал шярава дайдирхьусса экологиялул акциялул даву тIитIлатIисса мажлисрай гьурттушинна дан бувкIун бия Москавлиясса ва МахIачкъалалиясса бусрав­сса хъамал: ПаччахIлугърал Думалул депутат Аьбдулмажид МахIрамов, Дагъусттаннал БакIчинал ва ХIукуматрал администрациялул управлениялул хъунмур Тамара Чиненная, Лакрал райондалул БакIчи Юсуп МахIаммадов ва м.ц.
Хъин дайдихьу хьуннав, Лакку улклуй узданшиву ва марцIшиву ххишала хьуннав.