[dropcap]М[/dropcap]ай зурул 6-нний, ЦIуминалийсса ЦIуссачIурттащиял шяраву хьунни аьдатравун дагьсса байран — Дагъусттаннал паччахIлугърал ва жяматрал ишккакку Сиражуттин Илиясовлул призру ласунсса футболданул турнир — «Лакку кIанттул кубок – 2018».
Андриана Аьбдуллаева
«Лакку кIанттул кубок» гьашину шамилчинни хъанахъисса. Цалчин ва бяст-ччал хьуссар 2016 шинал «Гъази-Гъумучи» тIисса ихIсандалул фондрал сипталий. Фондрал каялувчинугу хъанахъиссар Дивирдул арс Дибиров АьвдурахIин. Ва даврицIун гьарица шинах кабакьу буллалиссар Лакрал, ЦIуссалакрал ва Ккуллал районнал бакIчитуралгу.
Гьашину турнирданий гьуртту хьунни 35 шяравасса 38 команда. Вихьуллал, Ххутрал ва ЦIуссалакрал шяраваллава дия кIи-кIира команда. ЦIанасса турнирданий уттинин къадиркIсса шанна шяраваллил – ЦIущардал, БахIикIуллал ва ТтурчIиял (ЦIуссалак) командарттугу дия. ШавкIуллал командалуву мяйя ттуплий укку Жалаевхъал фамилия дусса ия. Бяст-ччаллу, март зурул 11-нния байбивхьуну, кIива зуруй най бур.
Ва кьини ЦIуссачIурттахь ччалли дуклай дия финалданувун дагьсса командартту: Ххут – КIундими ва Хъусращи – Ккул.
Гьашинусса турнирданул чемпион хьунни Ккуллал жагьилтурал команда. КIилчинсса кIану бувгьунни Ххутрал командалул ва шамилчинсса кIану кIибавчIунни КIундиннал ва Хъусращиял командарттал. Финалданийн дурксса командарттансса призрал фонд дия 350 азарда къуруш.
Ххув хьусса командарттан бахшишру дуллай бия ДР-лул Халкьуннал Мажлисрал депутатътал Амирхан Амирханов ва Рустам Кьурбанов, Лакрал райондалул бакIчи Юсуп МахIаммадов, «Гъази-Гъумучи» фондрал хъунама АьвдурахIин Дибиров, Марат ва Морис Илиясовхъул.
Ахирмахъгу лавхъун, цалчинсса кIану бувгьусса Ккуллал командалун кубок ва бахшиш дуллуна Сиражуттин Илиясовлул. Шиккува кIицI лаган, финалданий лавсъсса кубок абадлий командалучIа личIантIиссар, агана му команда шамийлла ххув хьурча.
«Лакку кIанттул кубок» хьунни республикалул ва жула миллатрал оьрмулуву агьамсса кIану бугьлагьисса ишну. ЧIирисса чIумул мутталий турнирданул сий хъиннура гьаз хъанай дур, ялу-ялун чIяву хъанай бур шикку гьуртту хьун ччисса жагьилтал ва спорт ххирасса тамашачитал.
