Буттал улча лахьхьаврил слет

Май зурул 13-нний ЦIуминалийсса ЦIуссалакрал райондалий хьунни буттал улча лахьхьаврин хас дурсса, аьдатравун дагьсса республикалул 64-мур слет. Гьашину ацIулчинсса шинни ва слет, АьФ-лул лайкь хьусса учитель Абакаров Валериан Камиловичлул аьпа абад баву мурадрай, дуллалисса.


Имара Саидова
ДакIнийн бутанну, ЦIуссалак­рал райондалий туристътурал ва буттал улча ахттар баврин хас дурсса слет сакин даврил сиптачигу Абакаров Валериан Камилович хьушиву.
Гьашинусса слетрай гьуртту хьунни ЦIуминалийсса шяраваллавусса урчIвагу школалул командартту.

Слетрал даву дайдихьлахьи­сса мажлисрайн бувкIун бия ЦIуссалакрал райондалул бакIчи ХIажи Айдиев, шяраваллал администрациярдал хъуними, КIул­шивуртту дулаврил ва Культуралул управлениярттал зузалт. БувкIун бия Валериан Камиловичлущал архIал зий бивкIми, гъан-мачча, дустал, ва суккушиндарал гьану бизаврил чIарав бавцIуну бивкIсса Рапи Абакаров, Сулайман АхIмадов, Къаплан Шаллаев, Сайпуллагь Аьвдуразакьов, Тамерлан ХIажиев, Зиябуттин НикIамахIаммадов.

Цинявппа гьуртту хъана­хъи­ми барчагу бувну, райондалул бакIчинал чIа увкунни тIай­лабацIу ва кIицI лавгунни слетрал даврицIун дархIусса цинярдагу шартIру лавайсса даражалий дузал дурну душиву.

Дуклаки оьрчIал чIарав бацIан соревнованиялийн бувкIун бия школардал директортал ва учительтал.
Слет дайдирхьуна гимн учаврийну ва Аьрасатнал ттугъ гьаз баврийну. Ва кьинисса мероприятиялул сий хъиннура гьаз дуруна ЦIуссаккуллал 2-мур школалул къавтIаврил ансамбльданул, ЦIуссаккуллал 2-мур ва Чапаевкаллал 2-мур школалул чIава акробатътурал ва райондалул Культуралул къатлул зузалтрал.

Командарттал дянивсса бяст-ччаллу бия буттал улча ахттар баврия, туристшиврул техника кIулшиврия, викторина даврия ва медициналия цIухху-бусу бавриясса.
Командарттан аьмсса кьимат­ру бишлашийни, хIисавравун ласлай бия чятирду тIайлану бищавугу. Жюрилуву бия Дагъусттаннал республикалийсса Аьрасатнал ГУ МЧС-рал лавайсса категориялул зузала Халил Мусаев бакIчисса ххассал бувулт.

Кьинибархан къизгъинну нанисса бяст-ччаллаву цалчин­сса кIану бувгьуна ТIюхчардал 1-мур школалул командалул, кIилчинмур – Шушиннал ва ЦIуссаккуллал 2-мур школарттал командарттайх кIибавчIунни, шамилчинмур – Аьхъардал школалул командалул.
ХьхьичIун ливчуминнан ва ххув хьусса командарттан буллунни дип­ломру ва кубокру.

Слетрал хIасиллу дуллай, ДЮСШ-рал директор Сергей Аьли­мовлул кIицI лавгунни мероприятие лавайсса даражалий хIасул дурну душиву ва барчаллагь увкунни ва давривух чялишсса гьурттушинна дурсса ва хъунмасса захIмат бивхьусса ЦIуссаккуллал ва Чапаевкаллал школарттахь.