[dropcap]М[/dropcap]айрал 1-нний Каспийскалий Аьли Аьлиевлул цIанийсса Спорт­рал къатраву шадлугърал тагьарданий тIиртIунни 2018 шинал лачIун буккаврил Европанал чемпионат.

ХIасан Аьдилов
Хъуннасса турнирданул бусравсса хъамалну бия Аьрасатнал Федерациялул спортрал министр Павел Колобков, Дагъусттан Республикалул БакIчинал кIанайма Владимир Васильев, ЦачIун дур лачIун буккаврил дунияллул (uww) президент, Дунияллул халкьуннал дянивсса олимпий комитетрал исполкомрал член Ненад Лалович, АьФ-лул субъектирттал, Аьрасатнал лачIун буккаврил федерациялул каялувчитал, цIа дурксса спортсментал ва тренертал, журналистътал.

Чемпионат тIитIаврий махъ лахъан хьхьичI Владимир Васильевлул дур­ккунни АьФ-лул Президент Владимир Путиннул чулухатусса лаизаву, муний паччахIлугърал бакIчинал цинявннахь барча кунни Спортрал турнир тIитIаву.
«Лавайсса даражалул дунияллул халкьуннал дянивсса турнир цалчин дуллалиссар Дагъусттан Республикалий. Жу багьавай пахрулий буру жула цIа дурк­сса лачIунбуккултрал цIардая ва миннал ххувшавурттая. Жу дакI дарцIуну бур цIанасса чемпионат яла лаваймур даражалийсса хьуншиврий. Хъунма­сса барчаллагь хьуннав Ненад Лаловичлун дакI аьчухшиврухлу, хIала-гьурттуну зунсса хIарачатрахлу, «спорт политикалуву дакъассар» тIисса принципрайн дакI тIайлашиврухлу», — тIий бур му лабизаврий.

Яла махъ лавхъунни Павел Колобковлул. «Ва региондалий лачIун буккаву – спортрал ца яла сий думур жура дур. Дагъусттаннал лачIунбуккултрал хьхьичIуннайшивурттал спортрахун бичин гъира бувтунни азарахъул оьрчI-бакIуннавун жула билаятрайгу, дазул кьатIувгу. Миннавасса ца Аьли Аьлиевлул цIа дирзун дур ва ххаллилсса Спорт­рал чIалъаьлун. Европанал 35 билаятрал вакилтал гьуртту хьусса вай бяст-ччаллу хьунтIиссар цинявннансса спортрал байранну», — увкунни Павел Колобковлул.

Ненад Лаловичлул увкунни: «Ссалам буллай ура зухьхьун, бюхттулсса Да­гъусттаннал халкь! Бюхттулсса, цанчирча зул спортсментурал спортрал тарихраву цалла цIарду мусил хIарпирдай чирчуну тIий. Бюхттулсса, цанчирча Дагъусттаннал вакилтуралгу, АьФ-лул Президентналгу, Аьрасатнал Спортрал министерствалулгу, ЛачIун буккаврил федерациялулгу дузал дурну дур ва куццуй ххаллилсса шартIру, жунна миннуйну хъанай дур кIилийнусса байран — 1-мур майрал ва лачIун буккаврил».

Официалну чемпионат тIиртIунни Дагъусттаннал БакIчи Владимир Васильевлул. Мунал цинявннан чIа увкунни гъирарайсса тамаша.