ЦIуминалийсса Чапаевкаллал шяравусса «Солнышко» садикрай хьунни Ххувшаврил байрандалун хас дурсса шадлугъ.
Имара Саидова
Тарбиячитурал оьрчIахь бувсунни дяъвилул шиннардий къучагъну талай, виричушивуртту дуллай бивкIсса жула наслулия. Мюрщултралгу хъинну асар хьунну дурккунни дяъвилий гьуртту хьусса вирттаврахасса назмурду, увкунни балайрду, дунни къавтIавуртту.
ОьрчIал багъравун бувкIун бия бусравсса хъамал – ДР-лул Халкьуннал Мажлисрал депутат Амирхан Амирханов, ЦIуссалакрал райондалул бакIчинал хъиривчу Алик Исрапилов, Чапаевкаллал шяраваллил бакIчинал хъиривчу Марис МахIаммадов, ЦIуминалий цIуну тIивтIусса «Сказка» ва «Радуга №1» садикирттал каялувчитал.
Цинявппа рязийсса даражалий хьунни мюрщултрал хIадур дурсса ххаллилсса байран.
