ДакIнихтунусса кьурчIишиву кIидачIлай буру Качар ХIусайнаевахь ва цинявгу гъан-маччанахь, Шамай ХIусайнаева дунияллия лагаврийн бувну. Лакрал язисса чичу, Абачара ХIусайнаевлул кулпат, ванал шеърирдаву абад бувсса «кагьрубалул чIантIив», бакI-чурххал бювхъусса, мазрал пасихIсса, учайсса мукъуй цIу бусса
ШАМАЙ
бия лакрал фольклорданух эшкьи хьусса, миллатрал исвагьи литература ххуйну кIулсса инсан. Ванил бавтIсса лакку шаммарду итабавкьуссия лакрал кказитрай ва журналлай. Ванил ихтилат мудангу вичIи дирхьума хIайран уванну пасихIну бувайссия. Ххирая миллатрал тарих, культура, аьдатру. Ххирая лак. Ва бия ласнан ххаллилсса кулпат, оьрчIан ххуйсса нину, наслулун чIалачIин дакъа ххирасса бава. Шамайл рухI алжаннаву хьуннав, гьаттай нур дизаннав! Махъминнал оьрмурдай барачат бишиннав!
«Дараччи» клуб
МахIаммадлул арс Мунчаев Шамил
Майрал 15-нний ахиратравун лавгунни Плехановлул цIанийсса Аьрасатнал экономикалул академиялул Социал-политикалул ва гуманитар дуккаврил центрданул директор, тарихирттал элмурдал доктор, профессор,МахIаммадлул арс Шамил Мунчаев.
Шамил увну ур 1930-ку шинал Гъумучатусса МахIаммадлул ва Аьйшатлул кулпатраву. Буттал мина дирхьуну диркIун дур Закаталлай. Тиккува бувну, хъунигу хьуну бур мукьа арс ва ца душ. Мунчахъал оьрчIал дуккаврил чулухунмайсса гьунаргу, гъирагу бивкIун бур ляличIисса. Миннаву хъуна-хъунама Рауфгу, Шамилгу хьуну бур историктал. Камиллул бувккуссия физкультуралул факультет ва ХIусайннул – медициналул факультет, ссил Савдатлул – филологиялул факультет. Закаталлай школагу къуртал бувну, Шамил увххун ур М.В. Ломоносовлул цIанийсса Москавуллал паччахIлугърал университетрал историялул факультетрайн. Мунил хъирив бувккуну бур аспирантура, 1963-ку шинал дурурччуну дур элмулул кандидатшиврул диссертация, 1972-ку шинал дурурччуну дур докторшиврул диссертация.
Мунияр махъ мукьцIалунния лирчусса шинну дурну дур Шамиллул Экономикалул академиялуву зий. Ва увчIуссия мува академиялул тарихирттал элмурдал кафедралул хъунаманугу.
Профессор Виктор Устиновлущал уртакьну ванал ацIнияхъайсса вузирдансса тарихрал учебникру чивчуну бур. Ми учебникру щала Аьрасатнаву бусравну бур.
Ванал чялишну гьаз байссия кьинилул масъаларттугу. Къиримнал бачIижазира Аьрасатнал зана бувкун, Шамил Мунчаевлул Аьрасатнал аьлимтураву цалчин чивчуссар Къирим зана битаврил хIакъиравусса лу.
ОьрчIшиву Закаталлай гьарчагу, ванан хъинну ххирая лак. Гьарца шинал учIайссия Дагъусттаннайн, Гъумукун, ияйссия Закаталлай бувччусса нитти-буттал гьаттайн. Шамил Мунчаев тачIав дакIния къауккантIиссар.
Дустал, гьалмахтал, уртакьтал
Рамазаннул арс Рамазанов Ирбагьина
Оьрмулул 89 шинаву дунияллия лавгунни жяматрал дянив бусравну оьрму бувтсса чув Рамазаннул арс Рамазанов Ирбагьина.
Увну ур Ирбагьина ЧIяйннал шяраву Рамазаннул ва ПатIиматлул кулпатраву. Цал хъун дяъвилул хьхьичI шинал ппу, яла ЦIуссалаккуйсса ЦIуссаккулув бизан бувну ца шинава нинугу ялату ларгукун, Ирбагьинан хъунама уссу Исящал багьссар ссурварал ва цалва къайгъу буллан. 16 шинаву Избербашрай механизатор шайсса училищагу къуртал бувну ванал захIматрал ххуллу байбивхьуссар Хасавюртуллал райондалийсса МТС-рай, яла трактористну зий. Та чIумал трактористуран бронь бунува, цала хушрай лавгссар армиялийн къуллугъ буллан. Зана хьуну махъ зун ивкIссар трактористну, комбайнерну, трактордал бригадалул учетчикну. ЦIуссаккуллал шяраву «Лениннул» цIанийсса колхозрай. Зий унува, хьхьувайсса школалий 9-10 классругу къуртал бувну, хъирив заочнайну бувккуссар Орджоникидзелийсса Зунттал шяраваллил хозяйствалул зоотехнический факультет. Муния махъсса ванал даву ризкьи-кьинилуцIун дархIусса дуссия, зий уссия фермалул каялувчину, колхозрал хъунама зоотехникну.
Ирбагьинал хIалал дурссар «ХIурматрал лишан» тIисса орден, медаллу, грамотарду, бахшишру.
Ххирая ванан хъамал, дустал, гъан-маччами, чIахху-чIарахми ва шяравуми. Ирбагьинал ва ванал кулпат Савдатлул бур 7 оьрчI (шама арс ва мукьва душ).
Ирбагьина аьпалул шаврил кьурчIишивугу кIидачIлай, жижара буллай буру кулпатрахь, арсурваврахь, душваврахь, миннал наслулухь, ссихь ва щалвагу агьлу-авладрахь.
Имандалий лавгун лякъиннав, алжаннул ххари уваннав, рухI хъинний дишиннав.
ЧIяйннал, ЦIуссаккуллал жямат
МахIаммадлул душ Амаева Зайнаб
[dropcap]О[/dropcap]ьрмулул 82 шинаву дунияллия лавгунни узданну оьрму бувтсса захIматрал ветеран Амаева Зайнаб МахIаммадлул душ. Зайнаб бувну бур 1936 шинал ГьунчIукьатIрал шяраву. ЧIивину буна Славинска тIисса станицалий нитти-буттащал ялапар хъанай бивкIун бур.
Дяъви байбивхьукун, зана хьуну бур шаппайн. Буттагу дяъвилийн лавгун, ниттил хъунма бувну бур. 1958 шинал ванил къуртал бувну бур педучилище, 1968 шинал – Дагъусттаннал пединститут. Зий бивкIун бур оьрус мазрал дарс дишайсса учительницану ЦIуссалаккуй, Буйнакскалий ва МахIачкъалалив. Пенсиялийн бувккун махъгу зий бивкIун бур личIи-личIисса давурттай. Ци даврий зий бунугу, Зайнаблул цилла даву лажин кIялану биттур дуллай бивкIссар.
Ва бия ас-намус бусса, цума-цаннангу кумаг буван, чIарав бацIан чялишсса дакIнил заллу. Цила пенсиялия ванил ахIвал кIюланан чичайва «Илчи» кказит, кказитрал дуллалисса даврин кумагран ка кIидахIингу махъунмай къашайва.
Зайнаблул бивкIулул кьурчIишиву кIидачIлай, жижара буллай буру ванил цинявппагу ссурахъаврахь, хаснува Магьиятлухь, Аьлихь, Эриклухь ва цинявппагу гъан-маччаминнахь.
Зайнаблул рухI хъинний дишиннав, алжан нясив баннав.
ГьунчIукьатIрал жямат
КъюмайтIутIи бугьаврил план бартдиргьуну дур
ХIасан Аьдилов
ДР-лул Шяраваллил хозяйствалул министерствалул ккаккиярттайн бувну, гьашину интту къюмайтIутIи бугьаврил план бартдиргьуну дур, ва ялунгу 15% тIутIул ххишаласса бувгьуну бур. Бугьаврил план диркIссар 500 гектар, иширайну дургьуну бур 620 гектар къюмайтIутIул.
МахIарамккантуллал райондалул хозяйстварттал бувгьуну бур 120 гектарданийсса, Сулайман-СтальскIаллал райондалул хозяйстварттал – 100 гектарданийсса къюмайтIутIи. ХьхьичIунсса ккаккияртту хьун дурну дур мукунна Хасавюртуллал ва Къизилюртуллал районнал хозяйстварттал.
Гьашину Дагъусттаннай бугьан ккаккан бувну бивкIссар 1500 гектар къюмайтIутIул. ЦIанасса ппурттуву республикалий бур 25 азарда гектарданийсса, миннувату 18 азарда гектар дур ахъулсса шайсса.
Щалагу «Илчи» кказитрал коллективрал цIанияту дакIнихтунусса жижара буллай буру жула даврил ва багьу-бизулул уртакь Качар ХIусайнаевахь, ванил аьзизсса нину
Шамай
аьпалухьхьун лагаврийн бувну.
Цил бунагьирттал аьпа баннав, рухI рахIатний дишиннав.
«Илчилул» редакция
ДакIнихтуну хъуннасса кьурчIишиву кIидачIлай, жижара буллай буру ХIусайнаева Качар Абачарал душнихь, ванил нину
Шамай
ахиратрал шаврийн бувну.
Махъминнал оьрмурдай барачат бишиннав! Оьрмулул увччуну акъасса цучIав дунияллия къагьаннав.
Шамайл рухI бигьаний дишиннав. Алжаннул ххари баннав.
Лакрал театрданул коллектив
ЧIяйннал жяматран хъинну ххирасса Абачарал душнихь Качар ХIусайнаевахь, хъуннасса кьурчIишивугу кIидачIлай, жижара буллай буру ванил аьзизсса нину
Шамай
аьпалул шаврийн бувну.
Алжаннул ххари баннав, рухI хъинний дишиннав. ОьрчIалгу, оьрчIал оьрчIалгу, махъсса гъан-маччаналгу оьрмурдай барачат бишиннав.
ЧIяйннал жяматрал цIания Шалласу Шалласуев,
Загьиди Аьбидов
Лакрал театрданул директор Бадрижат Набижуевнахь жижара буллай, дакIнихтунусса кьурчIишиву кIидачIлай буру, мунил аьзизсса нину
Аьишат
дунияллия лагаврийн бувну. Цил бунагьирттал аьпа баннав, алжаннул ххари буваннав! Аьишатлул наслулухьхьун ва гъанцириннахьхьун цIуллушиву дулуннав!
«Дараччи» клуб
