[dropcap]Б[/dropcap]уттал КIанттул цIанийсса дяъвилул тема чичултрал, шаэртурал ва художниктурал произведениярттаву мудангу ца язимур ххуттай диркIссар ва дуссар.Дагъусттаннал машгьурсса художник, Аьрасатнал лайкь хьусса художник Альберт Хаджаевлул суратирттавугу дяъвилул тема ца агьаммур дур, ва тема ванал дакIничIан гъанссагу дур, ванал ппугу, буттауссугу аьрай ватан дуручлай бивкIнавхьур.
ПатIимат Рамазанова
[dropcap]Ч[/dropcap]Iявусса инсантурал бюхттулсса кьимат бищай «Шикку литIуннин бавцIуну бивкIссар» тIисса суратран. Ва дур аьрая зана къавхьусса ласнах ялугьлагьисса зунттал хъамитайпалул къюву ккаккан дуллалисса сурат. Цалама ппу аьрая щаву дирну зана хьурчагу, Альберт Хаджаевлун куртIну асар хьуну дур ласурваврах ялугьлагьисса щахъаннил къюву.
— На суратру дихьлай айивхьуссара дяъвилул ппурттуву, тани мелвагу къабикIайва, на пачлива хъуручIул касак, кIалаш ларсун, чIирттай, чапардай, кIичIирттаву, бири-биривний суратру дихьлан икIайссияв. Ттун хIисав хъанан бивкIуна инсантал ттулла суратирттай тамаша буллай бушиву, кувгу, суратрай ша къабизан, чулухух хьуну занай бушиву. Гьай-гьай, тIааьнну дия ттулла суратирттахсса къулагъасгу, хIурматгу.
Хъунмасса гъира бия Ростоврайсса художествалул училищалувун дуклан гьан, тани Ухссавнил Ккавкказнаву ца му бакъа цамур худучилищагу бакъая, амма ххуллух дулунссарагу арцу дакъая. Буйнакскаллал финансирттал техникумравун дуклан уххан багьуна. Тиккугу на дурсса плакатру, афишартту ккаркни, учительталгу, ца зумату кунма, худучилищар вил кIану тIун бикIайва. Германнаву Дрезденнай аьрали къуллугъ бартбивгьуну мукьахгу на тиккува художникну зий авцIуссияв. Ттул шагьрулувун уккавансса сант дагьуна, ххаллилсса шагьру бия Дрезден, ивра Дрезденнал галереялувунгу, Цвингер замокравунгу, ккарккуна дунияллийх цIа ларгсса бюхттулсса художниктурал суратру. Амма шавай зана хьун багьлай бия, кIира шин Германнавугу дурну, зана хьуссара, — тIий, дакIнийн бутлай ур художник.
[dropcap]В[/dropcap]анал суратирттаву ябацIансса дур Дагъусттаннал цалчинсса летчица Бавер Жяъпаровал суратгу. Ва тани «Темп» (уттисса «Дружба») кинотеатрданул директорну зий бивкIун бур. Хаджаевлуйн оьвкуну бур, цачIава художникну зун нану куну. Сивсусса, ццах къакIулсса зунттал душнил чувшиврул хIайран увсса Хаджаевлул дурну дур ванил портрет. Альберт Хаджаев буттал шяраву, ГьунчIукьатIув, аьрая зана къавхьуминнан дацIан дурсса мемориалданул ца авторгу ур. Дяъви къуртал хьуну 73 шин гьарчагу, дяъвилул тема ванал творчествалуву яргнура дур. Дяъвилул оьрчIал дакIурдива буккан бувасса асарду суратирттай загьир бувансса гьунар ванан Заннал сахаватну буллуну бур. Ва гьунарданул хIарачатрайну дурсса суратирттал биян буллалисса асардугу, гьай-гьай, бюххансса, дакIру гьулусан дуллалисса бур.
