[dropcap]М[/dropcap]айрал 14-нний ДР-лул БакIчинал кIанайма Владимир Васильевлул дунни паччахIлугърал властьрал органнал каялувчитал гьурттусса батIаву.
Ххал бивгьунни республикалул агьамшиву дусса цаппара масъалартту. Цалчин ххал бивгьунни ххуллурдай апатIсса ишру шаврил тагьардануцIун бавхIусса масъалартту. Владимир Васильевлул бусаврийн бувну, республикалий ххуллурдай машинарттал апатIсса ишру шаврил тагьар хъинну захIматсса дур, апатIру гьарза хъанай бур. Майрал байранну ххуйну хьунни, амма миннул ахирданий хьусса 47 апатIсса иширал лагрулий 18 инсан ивкIунни, миннавату 3 – оьрчI-бакI.
«Му тагьар мукун ритан къабучIиссар. Низамрал ва жавабшиврул масъалартту цинявннайн багьлагьиссар, ххуллул низам лиян даврил жаваб дулун аьркинссар циняв машинартту бачин бувну наниминнал. Ми иширттал хъирив лаллан аьркинссар унгу-унгуну, му гьарцаманайн щилащиссар», — увкунни региондалул каялувчинал.
БатIаврий ххал бивгьунни мукунма школартту автобусирттал дузал баврил масъалартту. ДР-лул дуккаврил ва элмулул министр Уммупазил Оьмаровал бусаврийн бувну, 2016-2017-ку шиннардий Дагъусттаннал школарттан бувкIун бур 88 автобус, амма аьркинну бур цинявппагу 419. Миккува гьаз бунни школалул автобусрал шофернал харжирал масъалагу. ХIакьину мунал харж бур 9000 къуруш. Му масъалалул хIакъираву Владимир Васильевлул бувсунни цалвамур пикри.
Яла Дагъусттаннай Европанал чемпионат даврил хIасиллая бувсунни ДР-лул ХIукуматрал председательнал 1-ма хъиривчу Анатолий Карибовлул.
Владимир Васильевлул барчаллагь увкунни Дагъусттаннай лачIун буккаврил Европанал чемпионат давриву гьуртту хьуминнахь ва майрал байранну сакин дурминнахь.
БатIаврий Владимир Васильевлул ккаккан увунни Дагъусттаннал цIуллу-сагъшиву дуруччаврил цIусса министр – Жамалуттин ХIажиибрагьимов.
