Буккияра кьюкьлуй бацIан!

Буттал кIанттул цIанийсса Хъунмасса дяъвилий Ххувшаву ларсун 73 шин бартлаглагисса 9-мур майрал кьини щалагу Аьрасатнаву шай­сса «БивкIу бакъасса полкрал» акциялуву гьурттушинна дантIиссар Да­гъусттанналгу.


А. Аьбдуллаева
«БивкIу бакъасса полкрал» акциялийну жува цал ххишалану дакIнийн рутлатиссару тай Буттал кIанттул цIанийсса дяъвилул шинну, жандалия ка гьаз дурну Ватан дуручлай бивкIсса вирттал – аьралуннал ва флотрал ветерантал, партизантал, подпольщиктал, къинттуллух захIмат буллай бивкIми, концлагерьдай бивкIми, блокадниктал, дяъвилул оьрчIру. Ва маршрай гьурттушинна дан бюхъайссар гьарица инсаннаща. Так ларсун бучIан аьркинссар Ватан дуручлай талай бивкIсса цала гъанчунал суратру.
«БивкIу бакъасса полкрал» дастталий нанийни ххуйну итталун дагьланшиврул, сурат хъунна дурну, транспорант дарча хъинссар. Яла хъуннамур сурат А4 форматрал дикIан аьркинссар. Сурат, гъарал лачIурчагу, атил къахьун, ламинировать дарча хъинссар. Балики дяъвилул гьурттучитурал суратру яхьуну дакъахьурча, транспорантрай хъунисса хIарпирдай фамилия, цIа, бу­ттал цIа ва аьрали чин чичияра.
Аьдатравун багьсса куццуй, маршрай гьуртту хьун ччими Лениннул цIанийсса майданнив батIинтIиссар ссят 12.00 хьусса чIумал. Маршрай бачинтIиссар ссят 14.00. хьусса чIумал, майдандалия сукку хьуну, Р. ХIамзатовлул цIанийсса кучалийх Леваневскийл цIанийсса кIичIиравун бияннин. Мичча дастта Родопский бульварданул чулиннай кIура даентIиссар.
Акциялий гьуртту хъанахъиминнахь ихтияр дакъассар «БивкIу бакъасса полкрайн» къадагьай­сса политикалул ягу коммерциялул зумувнусса лишанну (символика) ишла дан.