[dropcap]М[/dropcap]айрал 23-нний ДР-лул БакIчинал кIанайма Владимир Васильевлул председательшиврий хьунни оператив масъалартту ххал бигьинсса батIаву.

[dropcap]Р[/dropcap]егиондалул бакIчинал бавтI­миннахь бувсунни Москавлив хьусса «Единая Россиялул» партконференциялия. Владимир Васильевлул бусаврийну, конференциялий ххал бивгьуну бур аьра­сатлувтурал оьрмулул даража лавай баврил хIакъиравусса масъалартту, мива масъалартту дузал буван аьркинссар Дагъус­ттаннайгу. «Президентнал жуйн тапшур бунни цалла Рисалалий ккаккан бувну бивкIсса масъаларттаха зун.

Микку аьч був­сса циняв масъалартту – ми инсантурал лабизавурттал хIасиллур. Ми масъалартту дузрайн буккан баврил хIасиллайну жяматраву хъин чулийсса дахханашивур­тту шаву хъанахъиссар агьалинал властьрал органнал давур­ттан кьимат бищаву. Инсантурал мурадирттаха зузавур жулла хъунмур ихтияргу, привелегиягу», — увкунни Дагъусттаннал БакIчинал кIанайманал.

Лаващиял райондалийсса Чуниннал шяравалу щинал дузал дансса объект даврил хIакъираву ихтилат бунни ДР-лул экономикалул министрнал кIанаймур Сакинат Къаллаевал. Мунил бусаврийну, давур­тту дуллай бур графикрацIун даркьуну ва объект къуртал дантIий дур шинал ахирданийнин.
Республикалий хъацIур­дищал­сса талатаврил хIакъираву бувсунни ДР-лул шяраваллил хозяйствалул ва бакIлахъиялул министр Аьбдулмуслим Аьбдулмуслимовлул. Мунал бусаврийну хIакьинусса кьини хъацIру багьну бур хъу-лухччинул 171 азарда гектарданийн. Ми ялу-ялун гьарза хъанай бур. ЦIанасса ппурттуву хъацIру бур Нугъайнал, Тарумовкаллал, Къизлардал ва Бабаюртуллал районнай. Миннущал талан хъинну захIматну бур.

БатIаврий ДР-лул Г.О.-лул ва ЧС-рал министрнал кIанайма Нариман КазиахIмадовлул бувсунни цаппара районнайн гуж­сса чявхъа гъараллал биян бувсса зараллу бухлаган буллалисса давурттал хIакъираву.