Загьир хьун дува магьиршиву

Вай гьантрай Журналистурал къатравусса «Город» тIисса кафелуву хьунни Москавуллал Машлул ва промышленностьрал палаталул (МТПП) АРТ-кластерданул вакилтуращалсса хьунабакьаву. Шикку гьуртту хьун бувкIун бия «Без границ» цIанилусса Москавуллал дунияллул халкьуннал дянивсса театрданул фестивальданул директор Эльмира Сирачева, АРТ-кластерданул каялувчи Дарья Гордеева, художник Элеонора Громова, Аьрасатнал президентначIасса граждан общество хьхьичIуннай даврил ва инсаннал ихтиярду дуруччаврил комиссиялул член Разита Мушидова.

А. Аьбдуллаева
Жагьилсса ишбажаранчитуран кабакьу буллалисса МТПП-лул Комитетрал Арт-кластерданул сипталий дайдихьлай дур «Содружество регионов» фестиваль. Арт-Кластер цуппагу сакин бувну бур «А у Вас?» тIисса медиа порталданул гьанулий. Ва портал дур бикIлилвасса Аьрасатнал халкьуннан ххуйну кIулсса творчествалул аудиториялунсса социал сеть.

Ванил мурадгу бур, щалагу Аьрасатнаву творчествалул агьлу кIул бувну, цачIун баву, Аьра­сатнал цинярдагу регионнал ляличIишивуртту кIул даву, гьунар бусса, магьирсса усттартал ашкара баву. «А у Вас?» тIисса медиа порталданул гьану бивзун гьашину шин хъанай дур. Шинал лажиндарай порталданул сий хъинну гьаз хьуну дур.

Порталданий сияхIрай бав­цIуминнаща бюхълай бур цала творчествалия бусан, цала арт продукция ккаккан дуллан.
Москавуллал машлул ва промышленностьрал палаталул Комитетрал Арт-кластерданул мурад бур жула билаятрал миллатирттал яргсса культура гъан даву ва цачIусса Аьрасатнал миллатрал культура дунияллул халкьуннал хьхьичIун ласаву. «Содружество регионов» тIисса Арт-кластерданул проектрал лагрулий хьунтIий дур музыка, театр, мода, живопись майшан тIисса Москавуллал жагьилтурал культуралул фестиваль, мукунна — Дунияллул халкьуннал дянивсса джазрал музыкалул фестиваль.

Шикку гьуртту хьунтIиссар мукунма личIи-личIисса билаятирттал жагьилсса театрдал коллективру: Испаннал, Италиянал, Франциянал, Иорданиянал, Египетнал, Марокканал, Мексиканал, Кьиблалул Кореянал, Чилилул вакилтал.
МТПП-лул жагьилтурал комитетрал проектрал кабакьу бантIиссар жагьилсса дизайнертал хьхьичIунмай бан, миннан дазул кьатIув, дунияллул ареналийн буккан. Гьарта-гьарзану порталданул хIакъираву, цIухху-бусу бан ччисса бухьурчагу:
сайт: а-u-vas.ru
Е-mail: info @a-u-vas. чи
телефон:
+7 (985) 419-419-3.