[dropcap]М[/dropcap]артрал 26-нний ЦIуссалакрал райондалул администрациялий хьунни райондалул активращалсса ирглийсса батIаву. Шикку гьуртту хьунни ЦIуссалакрал райондалул чулухасса Халкьуннал Мажлисрал депутат Амирхан Амирхановгу.
Андриана Аьбдуллаева
[dropcap]С[/dropcap]овещание дачин дурну ия райондалул бакIчи ХIажи Айдиев. Цалчин ххал бивгьусса масъала бия Аьрасатнал Президент увчIаврил хIакъиравусса. Райондалул бакIчинал барчаллагь увкунни бувчIавуртту низамрай лагаву мурадрайсса давриву чялишсса гьурттушинна дурсса избирательтурал комиссиялуву бивкIминнахь, идарарттал хъуниминнахь, мукунма чIурду бичлачисса кIанттурдай хIадуршинна дурминнахь.
Хъирив ванал барча бунни культуралул ва искусствалул аралуву зузими, ярг-яргсса мероприятиярттайну райондалул жямат ххари буллалими Культуралул зузалтрал кьинилуцIун бавхIуну.
Бахшишру дурунни райондалул магьирлугърал даву хьхьичIуннай дан хъунмасса захIмат бивхьусса хIакьсса пишакартал МахIаммад ва Роза Аьлиевхъан, Написат Аьлисултанован, Аьйша Жабраилован, Минкаил ХIусайновлун.
Хъирив ЦIуминалийсса арендалий дуллусса аьрщарал инвентаризациялул хIакъиравусса ихтилат бунни райондалул бакIчинал хъиривчу Земфира Жиржисовал.
Райондалий терроризмалул иширттан ххуллу кьукьаву мурадрай, АТК-лул дуллалисса давурттая бувсунни райондалул бакIчинал хъиривчу Гайирбек Мусаевлул.
