ЦIуминалийсса ТIюхчардал 1-мур школалий хьунни Хъунмасса Буттал КIанттул цIанийсса дяъвилий Ххувшаву ларсун 73 шин шаврин хас дурсса «Зарница» тIисса райондалул аьрали ва спортрал тIуркIурдал бяст-ччал. Шикку гьуртту хьунни ЦIуминалийсса шяраваллавусса 9-гу школалул командартту.
Бяст-ччал байбишин хьхьичI школалул залдануву хьуна шадлугърал мажлис. Дуклаки оьрчIру ва цинявппагу шиккун бувкIми барча буллалисса ихтилат бувна школалул директор ЩайхахIмад Дадаевлул. Ванал бувсуна Хъундяъвилул тарихрая, та дяъвилий жула аьралитурал ккаккан дурсса къучагъшивурттая.
[pullquote]Спортрал бяст-ччаллаву гьуртту хьунни 14 команда. Микку цалчинмур кIану бувгьунни Чапаевкаллал школалул командалул, кIилчинмур – Гьамиящиял школалул командалул, шамилчинмур – ЦIуссалакрал школалул. [/pullquote]
Хъирив ихтилатру бунни ТIюхчардал школалул хъинсса дус, Аьрасатнал Виричу Загьид Загьидовлул.
Райондалул администрациялул хъунаманал хъиривчу ХIажи ХIажиевлул администрациялул чулухасса ХIурматрал грамотарду дуллунни ГТО-лул кьяйдарду лавайсса даражалий бартбивгьусса физкультуралул учительтуран: ХIажи Буттаевлун (ТIюхчардал школа), Неъматуллагь МахIаммадовлун (ДучIиннал школа), Издаг Сулайманован (ЦIуссаккуллал школа).
Дуклаки оьрчIал хIадур бувну бия «ЦучIав хъамакъаивтссар, цичIар хъамакъадиртссар» тIисса ххаллилсса литературалул ва музыкалул композициягу. «Дяъвилул оьрчIру» тIисса композиция ккаккан бунни Аьрали балайлул конкурсраву ххув хьусса ТIюхчардал школалул дуклаки душ Барцуева Алимал ва 3-мур, 4-мур классирттал дуклаки оьрчIал.
Цинявппа хIайран бувна цила ттаттан – дяъвилул ветеран ХIасанов МахIаммадлун хас дурну, 11-мур классраву дуклакисса ХIусманова Динал скрипкалий дурцусса макьандалул. Дина цуппагу Великий Устюг шагьрулий хьусса «В гостях у сказки» тIисса конкурсрал Гран-при ва Санкт-Петербурглив хьусса «Будущее планеты» тIисса конкурсрал диплом лайкь бувсса скрипка бищу бур.
Шадлугърал мажлис къуртал хьуну махъ школалул спортзалдануву байбивхьуна спортрал бяст-ччаллу: ттурникIрай гьаз шаву, ччалли лечаву, автомат, ппивгу бувну, батIаву, противогазру лаххаву, щавугу дархIуну, цIунцIия хьума иян аву ва м.ц. Жюрилун бигьану бакъая хIасиллу дан. Ахирданий, циняв рязийну, 1-мур кIану буллуна ТIюхчардал школалул командалун, кIилчинмур – ЦIуссаккуллал 2-мур школалун, шамилчинмур кIану кIибавчIуна Аьхъардал ва ДучIиннал школарттал командарттал.
Укуннасса мероприятие хьунни ЦIуссалакрал райондалийсса ЦIуссалакрал шяравугу. Спортрал бяст-ччаллаву гьуртту хьунни 14 команда. Микку цалчинмур кIану бувгьунни Чапаевкаллал школалул командалул, кIилчинмур – Гьамиящиял школалул командалул, шамилчинмур – ЦIуссалакрал школалул.
Ххув хьусса командарттан буллунни кубокру ва дипломру. ХьхьичIунсса кIанттурду бувгьусса командартту гьантIиссар цал Къизлардал райондалий хьунтIисса зоналул бяст-ччаллай гьуртту хьун. Микку хьхьичIун дуркмур команда гьуртту хьунтIиссар республикалул бяст-ччаллаву.
Райондалул администрациялул ва КIулшивуртту дулаврил управлениялул вакилтурал барчаллагь баян бунни ва даврил сакиншинначиталну хьусса Анзор Абакаровлуйн ва МахIач Акаевлуйн, школарттал директортурайн ва физкультуралул учительтурайн.
Андриана Аьбдуллаева,
Имара Саидова
