[dropcap]А[/dropcap]прель зурул 17-нний МахIачкъалаллал Централ библиотекалий хьунни щалагу Дагъусттаннай машгьурсса чичу, фронтовик Абакар Мудуновлун 100 шин шаврин хас бувсса аьпалул мажлис. Шикку гьуртту хьунни лакрал интеллигенция, ниттил мазрал учительтал, студентътал, дуклаки оьрчIру ва чичул гъан-маччами.
Имара Саидова
Абакар Мудуновлул оьрмулия ва творчествалия бусласисса махъру лавхъунни: ДР-лул Чичултрал союзрачIасса лакрал секциялул хъунама Илияс МахIаммадовлул, Дагъусттаннал халкьуннал чичу Мирза Давыдовлул, Дагъусттаннал халкьуннал шаэр Ссугъури Увайсовлул.
Шаэрнал творчествалун лавайсса кьимат бишлашисса ихтилатру бувна Дагъусттаннал Халкьуннал шаэр Космина Исрапиловал, Дагъусттаннал халкьуннал артист Хан Башировлул, машгьурсса фотокорреспондент Камил Чутуевлул, публицист Амин Аьбдуллаевлул, публицист, шаэр Алексей ХIажиевлул, «ЦIубарз» журналданул редактор Хизри Илиясовлул, шаэр Даниял Магьдиевлул.
Буттал аьпа абад бан бувкIминнахь барчаллагь увкуна чичул душ Гьидаят Мудуновал ва ванил душ ПатIима Чаллаевал.
