ДР-лул Халкьуннал Мажлисрал депутат Амирхан Амирхановлул январь зурул 31-нний Дагъус­ттаннал региондалийсса «Единая Россия» партиялул председатель Дмитрий Медведевлул приемнайлуву агьали кьамул бунни.

Имара Саидова
ЦIуссалакрал райондалия­сса Къапиев Аьвдулманап увкIун ия цIуминалийсса щархъавусса ттукIрал масъалалул хIакъираву. Ванал бувсунни щархъаву ччя-ччяни ттукI лешлай, азурда хъанай бушиву. Мукунма бикIан аьркинсса 220 вольтран кIанай 190 вольт буллай, чIявумур чIумал 130-ннийн багьлай бушиву.
Депутатнал бувсунни, бувчIин бунни ЦIуссалакрал райондалийсса ттукIрал масъала щаллу баврин 2018 шинал республикалул бюджетрава 50 миллион арцул итабавкьушиву. Вай арцух бантIий бур ттукIрал подстанция. Тамансса шиннардий лахъи лавгсса масъала дузрайн бу­ккан бансса умуд цIакь хьушиву бувсунни Амирхановлул.
МахIачкъалалиясса пенсионер Кьадиров МахIаммад увкIун ия тIайла бакъа цайва чивчусса газрахсса бурж яла бутан кумаг бара тIий. Депутатнал гава цIана оьвкуну «Газпром межрегионгаз Махачкала» ООО-лул каялувчитурайн, тапшур бунни ва иширал хъирив лаян.
Судрал бувсса хIукму приставтурал щаллу къабуллай бушиврийн бувну, му дузал бан кумаг ба тIий бувкIун бия МахIачкъалалив ялапар хъанахъисса МахIаммадова Сабина. Амирхан Амирхановлул судрал приставтурал хъунама Низами ХIалимовлуйн оьвкуну, аьрзирайн бувкIсса хъамитайпа кьамул баву тIалав бунни.
МахIачкъалалив ялапар хъанахъисса ХIусайнова Мадина бувкIун бия цилва душ оьрчIал багъравун кьамул бан кумаг бара тIий. Ванил бувсунни цила канихун шанма оьрчI багьну бушиву ва мунияту цуппа даврийн бу­ккан къахъанай бушиву. Му бия 83-мур оьрчIал багъравун кьамул буллалисса сияхIрай бавцIуну бунува, цукунчIав яржа биллай бакъашиву буслай. Депутатнал ванил ма­съала анаварсса мутталий дузал бан тапшур бунни МахIачкъалаллал КIулшивуртту дулаврил управлениялийн.
ДепутатначIан мукунма бувкIун бия бястлихун дагьсса аьрщарал, къатрал гьануцIакулсса ремонтрах­сса арцу дулаврил ва цаймигу ма­съаларттал хIакъиравусса агьали.
Амирхан Амирхановлул цала аякьалийн лавсунни ва кьини цайнна вихшала дурну бувкIсса агьалинал масъалартту.