Педагогтуралгу педагог

Жула цума-цанналгу оьрмулуву бивкIссар личIи-личIисса учительтал, тарбиячитал: садикравун лавгни, музыкалулкружокрайн заназийни, цал школалий, яла институтраву,яла аспирантуралуву ккалай бивкIни ва мукума цайми-цайми иширттавугу. Ми циняв личIайрив жунма дакIний?


Цуксса хIайпнугу, чIявуми дакIний къаливчIун лякъай, хIатта миннал цIардугума хъамадиртун лякъай. ЧIумул лиххан бай чIявусса затру жула памятрава.
Амма цаппара учительтал тIурча, жула кIулшилувун кьув­тIуну личIай бусса оьрмулухун. Мукунминнавасса цану ттул оьрмулуву хьуссар учительтуралгу учительну чIалачIисса инсан – Нураттин МахIаммадович Маммаев. Школалий му ттул яла ххирама учителъя, мунал яргсса сурат тачIавгу къагьанссар ттул итталату.
Шинну наниссаксса, вилвамур оьрмулувугу учениктал хIасул хьу­сса чIумал, педагогнал пишагу цирив бувчIусса чIумал, хъиннува исватну ва азгъунну асар хъанан бикIай ттун ци бюхъулул ва ци даражалул профессионалну ивкIссарив Нураттин МахIаммадович, цуксса лавайсса мяърипатрал заллу ивкIссарив, инсан хIисаврайгу.
Гьай-гьай, цинявннан ччи­сса, ххирасса дия учин къахьунссар мунал дишайсса предмет – математика, амма ттула школалул дустурал дянив, чIунархIал оьрчIаву ттун цаягу къаккавкссар Нура­ттин МахIаммадовичлуя жагъала­сса жуав дуллалисса. Му къаххира хьун, къахIурмат бан бю­хъайсса инсан акъая, цанбакъарча гьарцагу дуклаки оьрчIал, душнил кьад­ру бусса ивкIун тIий, миннай дакI цIуцIисса ивкIун тIий. Мунал дарсру, ми дишаврил стиль, кьяйда, оьрчIащалсса хIала-гьурттушиву винна ччимур методикалул пособияну дацIансса дия.
Магьирсса педагог акъассагу, профессионал акъассагу, му ия хъуннасса эрудициялул инсангу, так ца цанна мунан хасъса ляличIиссара юморданул заллугу ия.
Ттун цимилвагу тIайлабацIу хьуссар, цала дустуращал жуннийн, ттул буттачIан, хъамалу увкIни, цала бивщусса мандолиналухун Нураттин МахIам­мадовичлул тIутIисса нахIусса лакку балайрдах вичIи дишин­сса.
Цуксса хIайпнугу, ччяни личIи хьуна жуятува Нураттин МахIаммадович. Амма мунаясса аьпа личIантIиссар абадлий мунал дарс дирхьусса гьарцагу ученикнал дакIний. Хъинну тIайлану хьунссия тIийгу ура, Гъумучиял дянивсса даражалул школалун Нураттин МахIаммадович Маммаевлул цIа дизарча ва, мунал 90 шинал юбилейрацIун бавхIуну, Гъумуксса цания ца кIичIираваллингу мунал цIа рищурча.
Малик Гъапуров,

ДНЦ-лул председательнал заместитель, физико-математикалул элмурдал доктор