[dropcap]О[/dropcap]ктябрь зурул 21-нний Ккуллал райондалий Ваччиял школалул спортзалдануву хьунни щала Аьрасатнаву нанисса ОБЖ-лул (Основы безопасности жизнедеятельности) олимпиадалул райондалул этап. Гьуртту хъанахъиминнавух бия: Хъусращиял, Ккуллал 1-мур, Хъювхъиял, Къяннал, СумбатIуллал, Ваччиял школар­ттал 7-11-ми классирттал оьрчIру.

 

 

[dropcap]О[/dropcap]лимпиадалийнсса суаллу лавсун увкIун ия Дагъусттаннал КIулшиву дулаврил министерствалул вакил Гучаев Артур. Олимпиадалулсса буллай бия: Ккуллал райондалул УО-лул бакIчинал хъиривма Оьмариев Жамалуттин, УО-лул пишакартал АхIмадов Нуруттин ва ХIусайнов Юсуп, ЧIяйннал школалул ОБЖ-лул учитель Рамазанов Аслан.
Тестирдайсса суаллу бия оьр­мулуву ччимур чIумал хьунабакьин бюхъайсса иширттан хас бувсса: шагьрулул транспортраву нанисса чIумал инсаннан арцу чув дишин аьркинссарив, щаву цукун дахIин аьркинссарив, интернетрал кумаграйну инсантурая арцу цIиклакисса иширттаясса, ка-ччан гъаргъни цукун кумаг буван аьркинссарив ва чIявусса цаймигу. Теориялулми суаллая махъ бия практикалул зумунусса суаллугу, масалдаран, газрал плиталий нагь шашан дуллалисса кIункIурдуцIух цIу лачIурча, му цукун лещан дуван аьркинссарив, противогаз цукун лаххан аьркинссарив ва цаймигу суаллу.
ОьрчIал давурттан кьимат бищунтIиссар МахIач­къалаливсса центрданул, бу­сан­тIиссар республикалул­мур этапрай цу гьуртту хьун­тIиссаривгу.