Мюнпатсса рейдру дунни

Ухссавнил Ккавкказуллал федерал округрай ца яла хъунмур ва ялу-ялун хъунма хъанахъимур шагьрулун ккаллину бур МахIачкъала. Гьарица шинай шикку сакин хъанай бур 4 азарунния ливчусса кулпатру.

КIулсса куццуй, жучIава хъатIив бай ляличIинува гурну. ХъатIул яла чIиримур кортеж 10-нния ливчусса машинарттая хьусса дикIай. Агьалинал чулуха чIявусса аьрзри букIлай бур полициялул зузалтрачIан хъатIул кортежир­ттал аьлагъужалул хIакъиравусса. Хъиннува захIматсса иш бикIай бигьалагай кьинирдай, хаснува ЗАГС-рал къатрал чIарав, цIусса кулпат сакин буллалиминнал сайр байсса, фотосессияртту байсса кIанттурдай.
ХъатIул кортежраву нанисса шупIиртурал цинявннал дуллалисса тIулдакъашивуртту ца журалул дур. Миннал бацIан буллай бур машинартту къабучIи буллалисса кIанттурдай, къулагъас дуллай бакъар светофордах, буклай бур хьунив ххуллийн.
Укунсса ишру ашкара баву ва миннун къадагъа даву мурадрай ДПС-рал батальондалул зузалтрал Национал гвардиялул зузалтращал цачIу дурну дур профилактикалул мероприятияртту. Рейдру дурну дур цIусса кулпат буллалими лагайсса кIанттурдай: Р. ХIамзатовлул цIанийсса кучалий ЗАГС-рал къатри дусса кIанттурдай, Пушкиннул цIанийсса кIичIираву, Родопский бульварданий, М. ХIажиевлул цIанийсса кучалий, генерал М. Оьмаровлул цIанийсса кучалий, ХI. ХIамидовлул ва А-Х. Султаннул цIанийсса кIичIираваллал шанбачIулий. Ххал бувну бур 150-нния ливчусса машинартту. ГИБДД-лул зузалтрал мурад бия шупIиртуращал ххуллул низам дуруччаврил хIакъираву ихтилат баву.
Амма цаппара ишру так ихтилатрайну къуртал къавхьунни.
ХъатIул кортежраву нани­сса шупIиртурал чIявуминнал па­ссажир бувцуну наниминнаясса тIалавшиннарду дуручлай бакъар. Пассажиртал мухIулттив дархIуну къабивкIун тIий жавабрайн увцуну ур 72 шупIир. Хьунабавкьунни ишру машинартту ккаккан къабувсса кIанттурдай бацIан був­сса, мюрщисса оьрчIру креслорду бакъана щябивтсса, шупIирначIа удостоверение бакъасса, машиналул пюрунтрайх пленка бавкьусса, страховка дакъасса, шупIир хьунив ххуллийн увксса, светофорданух ва ххуллул лишаннах къула­гъас къадурсса.
Цаппара низамрава бувксса иширтталшиврий, 9 машина тIайла бувккун бур стоянкалийн. Аьмну ашкара бувну бур ххуллул низам къадурурччусса 105 иш. Ва рейд­рал чIалачIи бунни кIицI лавгсса масъалартту ччя-ччяни хьунабакьлай бушиву ва ГИБДД-лул зузалт­ран вайннул ялув бацIан багьлай бушиву.
Укунсса рейдру ххишалану дуллан аьркинну бур чIявусса хъатIив бикIайсса бигьалагай кьинирдай. Миннул агьаммур мурадгу хъатIул кортежраву наниминнан зат бувчIин бан бюхъаву бур.
Рульданух щяивкIманал ба­ччибакъашиву сававну хъунма­сса бала хьун бюхъайссар, яла ххаримур кьини яла пашманмунийн кIуракъадаен личIлулну бикIан аьркинссар.
МахIачкъала шагьрулул администрациялул пресс-службалул управление

ХIадур бувссар
А. Аьбдуллаевал