ХIала-ккаласса дандибуккавуртту Дарбантливгу дунни

[dropcap]Г[/dropcap]ьашину сентябрьданул 9-нний Дарбантлив хьунни «Селектион Варриорс» (биюлт батIул баву) тIисса проектрал каялувчи Аьвдулкарин Айгуновлул дайсса хIала-ккаласса журалул (смешанные единоборства) дандибуккавуртту. Ва турнир хьунтIишиврул хIакъираву жу бувсун буссия сентябрьданул 8-нний бувксса «Илчилий». Шиккува бусан, укунсса турниргу Аь. Айгуновлул уттинин дурссар МахIачкъалалив кIийлла, Москавлив, Каспийскалий. Ва ххуллух дунни Дарбантлив.

ХIасан Аьдилов
[dropcap]Ж[/dropcap]у Анжилия Дарбантлив бувкIсса чIумал, «Нарын-Къала» тIисса шадлугъирттал къатта бувцIуну бия инсантурал. Дя­къатлуву дузал бувну бия ринг, лагмава нацIу-кьацIурдал, ахъул­ссаннул ва хIачIиялул къур був­сса столлах щя-щябивкIун бия тамашачитал. ЧIявусса цIа дурксса спортсментал, Европанал ва дунияллул чемпионтал, спортрал ветерантал, Дарбантуллал ва райондалул бакIчитал бия тамашалийн бувкIун. «Нарын-Къалалувун» бухлахими хъинну ялув бавцIуну ххал буллай бия ихтиярду дуруччай органнал зузалтрал. Турнир сакин дурну дия лавайсса даражалул сакиншиндарай.
Бяст-ччаллу байбишин хьхьичI бавтIминнахь аьла-сса­лам буллалисса махъру лавхъуна турнирданул сакиншинначи Аьбдулкарим Айгуновлул, МахIачкъалалия бувкIсса цIа дурксса спортсментурал ва Дарбантуллал бакIчинал.
Яла байбивхьуна бяст-ччаллу. 57 килорал кIушиврий би­ян бувккунни Азирбижаннаясса гуржиричу Гия Кахидзе ва Аьли Мирзоев (Аьрасат). Ххув хьунни Гия Кахидзе.
61 килорал кIушиврий биллай бия Ислам Оьмаров (Аьрасат) ва ХIусайн Илиясов (Аьра­сат). Бугъ айсса приемрайну ххув хьунни И. Оьмаров.
66 килорай кIушиврий Камал Мирзаевлуяр (Аьрасат) Рамазан Аьлиев ххув хьунни, судиятурал хIукмулийну.
77 килорал кIушиврий Самур Камилов Нахид Байрамовлуяр ххув хьунни, судиятурал хIукмулийну.
84 килорал кIушиврий Октай Асланбеков ххув хьунни Кьурбан МахIаммадовлуяр нокаутрайну 1-мур раундрай.
70 килорал кIушиврий Заур МахIаммадов Орхан Маммедовлуяр (Азирбижан) ххув хьунни 2-мур раундрай, технический нокаут хIисаврай.
61 килорай Мурад МахIамма­дов ххув хьунни Мурад Аьв­дурахI­мановлуяр, базу цIуцIи байсса приемрайну.
77 килорал кIушиврий Шамидхан МахIаммадов ххув хьунни Аьбдул Аьлиевлуяр, бугъ ай­сса приемрайну.
93 килорал кIушиврий Муслимбек Муслимов ххув хьунни Юрий Горболенкояр (Украина).
93 килорал кIушиврий ла­кку оьрчI Мурад Рамазанов ххув хьунни, Москавлиясса Иван Арацкийщал ивну, 1-мур раундрайва.
93 килораяр ххишаласса кIу­шиврий Артур ХIусайнов 1-мур раундрайва, бугъ айсса прием дурну, ххув хьунни Къиргъиз Айжигит Жумабеклуяр.