[dropcap]В[/dropcap]ай гьантрай оьрмулул 80 шинал юбилей кIицI ларгунни Дагъусттан Рес­публикалул культуралул лайкь хьусса зузала, «Мусил перо»  ва «Мусил барзу» премиярттал лауреат Камил Чутуевлул.

Зулайхат Тахакьаева
ЦIанихсса фото-художник барча ан бувкIун бия Дагъус—ттан Республикалул Культуралул министр Зарема Буттаева, Лак—рал райондалул бакIчи Юсуп МахIаммадов ва ванал хъиривчу Абакар Къюннуев.
Республикалул магьирлугърал ишккаккултрал цIания Камил Чутуев барчагу увну, Зарема Буттаевал чIа увкунни ванан Дагъусттаннал магьирлугъ хьхьичIуннай дан­сса чIярусса шиннардийсса тIайлабацIу, цIуллушиву, кулпатраву талихI.
«Ина хьуссара художествалул суратрищавриха зузисса нажагьсса суратрищу. Вил суратирттал жула оьрмулул инсантал кIул бувай Дагъусттан улклул тарихращал, магьирлугъращал, архитектуралул гьайкаллащал. Вил давурттаву асар хъанай дур буттал аьрщарахсса ччаву, халкьуннал аьдатру кIулшиву, миллатрал хасиятрал ляличIишиву, ттуршукурдай цачIун дурмунил рувхIанийшиву, лавайсса художествалул пикри. Жура-журасса дур ина язи дургьусса темарду, усттарсса дур миннухсса ябитаву. Цумурцагу вил даву дур мяъна-мурадрал куртIсса,» — увкунни Зарема Буттаевал ва бувсунни Камил Чутуев кка­ккан увну ушиву «Аьрщарахсса ччаврихлу» тIисса ордендалун.
«ЯбатIин къашайсса бур вил суратирттайсса Дагъусттан, хаснува Лакку улча. Ца чIивисса тарихран ккалли бан­сса бур вил янил язи бувгьусса цумурцагу лахIза. Миннух уруглагийни ца лахIзалийссавагу бацIан бан бюхълай бур жуява яла лавгсса, нанисса замана. Асар хъанай дур ппухълуннал рухIру», — увкунни Юсуп МахIаммадовлул.
Чутуевхъал чIаххурай хъуна хьусса Абакар Къюннуевлул дакIнийн увтунни Камиллул ппу Амин, гьунардануцIун буттая арснайн ватандалухсса ччавугу ирсирай диршиврий чIурчIав дуллай. КIицI лавгунни му ччаву Камиллуща цалами оьрчIавугу дишин бювхъушиву, ччя-ччяни бучIайшиву ванал арсру-душру буттал къатлул ялтту буккан. ЧIана-чIивима Амин тIурча, буттал къатрал нуз лакъакьин, шагьрулия Гъумукун ивзун, райондалул администрациялий зий ушиву.
Камиллул кулпат, ванал дакIнилгу, пикрилулгу абадлийсса дус, ПатIиматлул кIицI лавгуна ЧчютIухъал кулпатраву дуртсса ххюцIаллий ряхра шинал манзилданий царагу гъи къаларгшиву къатри дакьин давриха къазий. Тти арсругу бушиву мува куццуй гьарца гъин­ттул къатраха зийнма. «Буттал къатлуву кунна, инсаннал дакI ларну, паракьатну, буруккин бакъа, чувчIав къадикIайссар, цанчирча буттал къатлуву яхъа­най дуссар буттахъал рухIру. Миннул жува буручлачиссару», — увкуна мунихун Камиллул.
Буттал къатлухсса кунна­сса дур Камиллул щала буттал аьрщарахссагу, Лакку улклух­ссагу ччаву. ВацIилу-Зунттуйн лажинну дурургсса ларзула ябатIин къашайсса дур Лакку улклул сурат. Мукунна ябатIин къашайсса дур Камиллул канила дурксса гьарца суратгу.